Թուրքիան Էրդողանին տապալել փորձող ամերիկաբնակ թուրք հոգևորականին ձերբակալելու հրահանգ է արձակել

Թուրքիայում ամերիկաբնակ թուրք հոգևորական Ֆեթհուլլահ Գյուլենի ձերբակալման հրահանգ է տրվել: Այս մասին հայտնում է բրիտանական The Guardian-ը՝ նշելով, որ այդ երկրի նախագահ Էրդողանը Գյուլենին մեղադրում է իրեն տապալելու փորձերի համար:

Լրատվամիջոցների փոխանցմամբ՝ հենց Գյուլենն է կանգնած վերջին շրջանում Թուրքիան ցնցած բողոքի ակցիաների, Էրդողանի և նրա մերձավոր շրջապատի կոռուպցիոն գործունեության բացահայտումների  ետևում: Նա բաց առճակատման մեջ է Էրդողանի հետ:

Գյուլենը 1999-ից բնակվում է Փենսիլվանիայում, և ավելի վաղ հայտնի էր դարձել, որ Անկարան Վաշինգտոնից ակնկալում է նրա արտահանձնումը, սակայն նման պահանջ կարող է լինել միայն ձերբակալման հրահանգի արձակումից հետո: Ձերբակալման հրահանգը աղբյուրը համարում է Էրդողանի ամենավճռորոշ քայլը Գյուլենի դեմ:

Աղբյուրը վերջին օրերին Թուրքիայում ձերբակալվող և ահաբեկչության համար մեղադրվող բարձրաստիճան լրագրողներին համարում է Գյուլենի մերձավորներ:

http://www.tert.am/am/news/2014/12/19/gulenarrestwarrant/1541204