Թուրքիայի «Գազի» համալսարանի գեղեցիկ արվեստների ֆակուլտետը 2015-ը համարելով հայերի իրականացրած բռնությունների 100-ամյակ, այդ թեմայով պլակատների միջազգային մրցույթ է հայտարարել: Համալսարանը կոչ-հրավերով դիմել է ամբողջ աշխարհի արվեստի գործիչներին:
Այս մասին տեղեկացնող թուրքական «Ռադիքալ» պարբերականը հիշեցնում է, որ ապրիլի 23-ին այն ժամանակ դեռ վարչապետ Ռեջեփ Էրդողանը ցավակցական ուղերձ էր հղել հայերին ողբերգական 1915-ի կապակցությամբ: Ըստ «Ռադիքալ»-ի` թուրքական կառավարության այդ քայլն աննախադեպ էր և ինչ-որ առումով նույնիսկ հուսադրող: Բայց ժամանակը ցույց տվեց, որ այդ հույսն իզուր էր: «Օրինակ` վերոնշյալ մրցույթը հակասում է Էրդողանի ուղերձում համառորեն առաջ քաշվող գաղափարին, ըստ որի` 1915-ի թեմայով պետք է զբաղվեն պատմաբաններն իրենց արխիվային ուսումնասիրություններով»,- գրում է թուրքական պարբերականը:
Հայտարարվել է, որ մրցույթին մասնակցելու հայտերի ընդունումն արդեն սկսվել է, իսկ որպես հայտերի ընդունման վերջնաժամկետ սահմանվել է 2015-ի հունվարի 5-ը:
Արվեստագետներին կոչ է արվել արվեստի միջոցով արտացոլել հայերին` թուրքերի հանդուրժողականությանը դավաճանածներ: Արդյունքները կամփոփվեն հունվարի 15-16-ին, իսկ փետրվարի 26-ին կկազմակերպվի համապատասխան ցուցահանադես:
Ըստ «Ռադիքալ»-ի` խնդրահարույց է հատկապես այն տեքստը, որն իբրև կոչ-հրավեր հացեագրվել է ողջ աշխարհի արվեստագետներին: Մրցույթը կրում է հետևյալ խորագիրը` «Անատոլիայից մինչև Կովկաս հայկական վայրագությունների մասին պլակատների մրցույթ»: Բացի այդ` հրավերի բուն տեքստում թուրքերի հասեցին շռայլվում են հումանիզմի ու հանդուրժողականության խոսքեր, իսկ հայերին վերագրվում են անհավատարմության հրեշավոր արարքներ: Նույնիսկ նշվում է, թե իբր հենց օսմանցիների շնորհիվ 19-րդ դարում հայերն ապրեցին իրենց ոսկե դարը:
«Ռադիքալ»-ը մտահոգություն է հայտնում, որ հակահայ քարոզչությունը տեղափոխվել է անգամ արվեստի տիրույթ և հայերին ներկայացնում անմարդկային դաժանությունների ֆոնին:
Leave a Reply