Ցեղասպանության 100-ամյակ. գերմանական խմբերն ընթերցումներ կանեն ողջ աշխարհում

Հայոց ցեղասպանության 100-րդ տարելիցի հետ կապված, Գերմանիայի մշակութային երկու հաստատություններ հայ գրական ստեղծագործությունների ընթերցանություն են կազմակերպում: Նախաձեռնության նպատակն է՝ հարգել հայ մտավորականության հիշատակը, որոնց 1915 թվականի ապրիլի 24-ին ձերբակալեցին եւ սպանեցին:

Ըստ «Asbarez»-ի, Լեփսիուսի տան տնօրեն Ռոլֆ Հոսֆելդը եւ Բեռլինի միջազգային գրական փառատոնի տնօրեն Ուլրիխ Շրայբերը նախաձեռնության մասին պատմել են միջազգային մամուլին:

«Զոհերի հիշատակին եւ միջազգային հանրությունից Հայոց ցեղասպանության ճանաչման պահանջով, մենք կոչ ենք անում ամբողջ աշխարհում 2015 թվականի ապրիլի 24-ին ընթերցումներ անցկացնել՝ կարդալով հայ հեղինակների գրական ստեղծագործությունները՝ ներառյալ Սիամանթոյի, Կոմիտասի, Եղիշե Չարենցի, Վիլյամ Սարոյանի, Հովհաննես Շիրազի, Պարույր Սեւակի, Հակոբ Մնձուրու, Սիլվա Կապուտիկյանի եւ Հրանտ Դինքի»,- ասել են նրանք:

Կոչի տակ ստորագրել են Ռոլֆ Հոսֆելդը, Կոնրադ Կունը, Ուլրիխ Շրայբերը եւ Հասմիկ Պապյանը, ինչից հետո 65 երկրներից ավելի 400 հոգի ավելացրել են իրենց անունները: Նրանց թվում են Նոբելյան մրցանակի դափնեկիրներ Էլֆրիդա Ելինեկը, Մարիո Վարգաս Լյոսան, Ջոն Կուտզեեն, Գերտա Մյուլլերը, Օրհան Փամուքը, ինչպես նաեւ Էլիֆ Շաֆակը, Ալբերտո Մանգելը, Բրեյթոն Բրեյտենբախը եւ Ջոն Էշբերին:

http://news.am/arm/news/244814.html