Քուրդ առաջնորդը Ցեղասպանության համար հայերից ներողություն է խնդրել

Շվեդիայի մայրաքաղաք Ստոկհոլմում Թուրքիայի Մարդին քաղաքի քուրդ քաղաքապետ Ահմեդ Թուրքը 1915-ի Ցեղասպանության համար ներողություն է խնդրել հայերից։
Թուրքական Marksist.org կայքի փոխանցմամբ՝ Շվեդիայի Սիգտունայի քաղաքապետարանի հրավերով Ստոկհոլմում գտնվող քրդական Դեմոկրատական հասարակությունների կոնգրեսի նախկին առաջնորդ, Մարդինի քաղաքապետ Ահմեդ Թուրքը ելույթով հանդես է եկել մի սեմինարում։
«Միջագետքը եւ Անատոլիան իրար հետ միասին ապրած տարբեր ժողովուրդներով են հարուստ, սակայն ամբողջ աշխարհը գիտի, որ այստեղ ապրած ժողովուրդները ցեղասպանության են ենթարկվել եւ ուծացվել։
1911-ին Իթթիհաթ վե թերաքի (երիտթուրքեր-խմբ) կուսակցության 3 առաջնորդներ հանդիպեցին եւ պատմական որոշում կայացրեցին՝ քչացնել քրիստոնյաներին, սուննի դարձնել ալեւիներին եւ ուծացնել քրդերին։
Ցավոք, այդ ծրագրի իրականացման ժամանակ 1915-ին քուրդ ժողովուրդը օգտագործվեց։ Մենք դեռ վերապրում ենք այն ցավը, որ մեր պապերն ու հայրերը մասնակցել են այդ կոտորածներին։ Մենք երբեք չենք մոռանա մեր եղբայրների ցավը»,-ասել է Ահմեդ Թուրքը՝ ներողություն խնդրելով հայերից, ասորիներից եւ եզդիներից։
http://news.am/arm/news/244423.html