Դինքի սպանության մեջ օտարերկրյա հատուկ ծառայությունների մատն է խառը. թուրք նախկին պաշտոնյա

Թուրքիայի ԶՈՒ Գլխավոր շտաբի հետախուզության վարչության նախկին պաշտոնյա Իսմայիլ Փեքինը պնդել է, թե լրագրող, «Ակօս» թերթի խմբագրապետ Հրանտ Դինքի սպանության մեջ օտարերկրյա հետախուզությունների մատն է խառը:
Ինչպես տեղեկացնում է «Իհլաս» լրատվական գործակալությունը, այդ մասին նախկին պաշտոնյան ասել է Սաքարիայի համալսարանում «Ցեղասպանությունն ու իրողությունները» խորագրով՝ Հայոց ցեղասպանությունը ժխտող համաժողովի ընթացքում ունեցած ելույթում:
«Թուրքերը հայերի հանդեպ ատելություն չեն զգում: Գուցե պատերազմի ընթացքում եղել է, սակայն դրանից դուրս ատելություն չկա: Հայերին կանխամտածված չեն սպանել, ցեղասպանություն չի եղել»,-թուրքական հայտնի թեզերն է պնդել պաշտոնյան:
Նա պնդել է, որ եթե Հրանտ Դինքի սպանությունը լավ ուսումնասիրվի, կապացուցվի օտար հետախուզությունների կապը դրա հետ:
«Սպանությունն իրագործվել է՝ այդ հարցերում պահանջները, պնդումներն ընդունել տալու և Թուրքիայի և Հայաստանի հարաբերությունների վիճակը վատթարացնելու նպատակով: Այս սպանության միջոցով թուրք հասարակության շրջանում հայերի հանդեպ լավ վերաբերմունք ձևավորվեց»,- ասել է Փեքինը:
«Ակօս» թերթի խմբագրապետ Հրանտ Դինքի սպանության գործով շարունակվող քննության ընթացքում երեկ հարցաքննվել է Ստամբուլի նախկին ոստիկանապետ Ջելալեթթին Ջերրահը:
Օրեր առաջ նույն գործի շրջանակներում այլ պաշտոնյաներ են հարցաքննվել: Նրանց թվում եղել է Ստամբուլի փոխքաղաքապետը, ով ժամանակին սպառնացել էր Հրանտ Դինքին և ում «նախազգուշացման» մասին իր հոդվածներից մեկում պատմել էր անձամբ խմբագրապետը:
http://www.tert.am/am/news/2014/12/16/dink-pekin/1537382