Հայոց ցեղասպանության հարյուրամյա տարելիցը կնշվի նաև Ստամբուլում. շատ հայեր կմիանան նախաձեռնությանը

Թուրքական և ամերիկա-հայկական կազմակերպությունները համատեղ աշխատանք են տանում Հայոց ցեղասպանության հարյուրերորդ տարելիցը նաև Ստամբուլում նշելու ուղղությամբ: Այս մասին հայտնում է Asbarez-ը:
Մասնավորապես՝ թուրքական DurDe հասարակական կազմակերպությունը և Project 2015 նախաձեռնությունը նախատեսում են նաև շատ թվով հայերի տեսնել Ստամբուլում՝ պատմական հարյուրամյա տարելիցը ոգեկոչելու համար:
DurDe-ից հայտարարել են, որ ցանկանում են իրենց հարգանքի տուրքը մատուցել Ցեղասպանության զոհերին ու Ցեղասպանությունից մազապուրծ հայերին, դա անել հայերի հետ միասին և այդ կերպ ճնշում գործադրել իրենց իշխանությունների վրա՝ Հայոց ցեղասպանությունը ճանաչելու համար:
Project 2015-ից էլ հայտարարել են, որ շատ հայեր պատրաստվում են այդ օրը լինել Ստամբուլում և այդ կերպ պատասխանատվության հրավիրել թուրքական իշխանություններին:
Նախատեսվում է Ապրիլի 24-ի երեկոյան հավաքվել Թաքսիմ հրապարակում, Շիշլիի հայոց գերեզմանատանը արարողակարգ մատուցել. այստեղ է թաղված հայ զինվոր Սևակ Բալըքչին, ով ծառայում էր թուրքական բանակում և թուրք զինվորի կողմից սպանվել էր 2011-ի ապրիլի 24-ին:
Վերջին մի քանի տարիներին թուրքական կազմակերպություններն Ստամբուլում նշել են Հայոց ցեղասպանության զոհերի ոգեկոչման օրը:
DurDe-ն մարդու իրավունքների, խտրականության դեմ պայքարող առաջատար թուրքական քաղաքացիական շարժում է: Project 2015-ն ԱՄՆ-ից գործող նախաձեռնություն է, որը համախմբում է հայերի, թուրքերի և ամերիկացիների:
http://www.tert.am/am/news/2014/12/09/ist-centennial-2015/1530786