Մուշի պատմական հայկական տներում ուսումնասիրություն է անցկացվել

Մուշ քաղաքում Ժողովուրդների դեմոկրատական կուսակցության ստեղծած հանձնաժողովը «Քաղաքային փոխակերպում» անունով ուսումնասիրություն է անցկացրել հայկական պատմական թաղամասում, որտեղ վերջին շրջանում հայկական տներ էին ավերվել:
Հանձնաժողովի անդամները այցելել են Մուշի հայկական թաղամասը, որը հնում անվանվել է «Ամրոց», ուսումնասիրել հայկական տների, եկեղեցու, այլ շինությունների վիճակը:
Աշխատանքներից հետո հանձնաժողովի անդամները կոչ են արել պահպանել այս շրջանի պատմությունը, որը գալիս է ուրարտական շրջանից:
Մուշ քաղաքի ամենահին կառույցներից մեկը համարվող հայկական Սուրբ Մարիամ Աստվածածին եկեղեցին, որը ևս այս թաղամասում է, ոչնչացման եզրին է: «Ակօսի» լրագրողն ավելի վաղ ահազանգել էր եկեղեցու իրավիճակի մասին, ինչից հետո նախկինում հայկական ընտանիքին պատկանող մի տուն և այդ եկեղեցին անցել էին Էրզրումի «Մշակութային արժեքների պահպանություն» կազմակերպության հովանավորության տակ: Այս ամենից հետո էլ, սակայն, եկեղեցին նույն անմխիթար վիճակում է:
Սուրբ Մարիամ Աստվածածին եկեղեցին Ցեղասպանությունից հետո վերածվել է մասնավոր սեփականության:
Նշենք, որ այս տարի Թուրքիայում որոշել էին քանդել նախկինում հայերին պատկանած Մուշի 500 պատմական տները՝ տեղում այլ շինություններ կառուցելու նպատակով։
Տեղի իշխանությունները ոչնչացրել էին տների 80 տոկոսը, սակայն ավելի ուշ որոշում էր կայացվել դադարեցնել ապամոնտաժման աշխատանքը։
Նյութը պատրաստեց Դոնարա Թորոսյանը
AllTurkey.am