Ֆիսկ. Հայերի եւ հրեաների ցեղասպանությունների միջեւ տարբերություն դնելը ռասիզմ է

Բրիտանացի լրագրող Ռոբերտ Ֆիսկը «The Independent»-ում հրապարակված «Գիտե՞ք, արդյոք, Հոլոքոստի եւ հոլոքոստի միջեւ տարբերությունը: Հայերը գիտեն» վերնագրով հոդվածում կրկին անդրադարձել է Հայոց ցեղասպանության թեմային:
Իր հոդվածում Ֆիսկը պատմել է, թե ինչպես են խմբագիրները Հայոց ցեղասպանության մասին իր հրապարակումներում ուղղել Հոլոքոստ բառը՝ Հ մեծատառը փոխելով փոքրատառի:
«Դա եղել է անցյալ դարի առաջին ցեղասպանությունը, մինչդեռ երկրորդը դարձել է հրեաների Հոլոքոստը: Զանգվածային սպանությունների երկու ակտերն էլ ակնհայտորեն պատմականորեն կապված են միմյանց: Թուրքերը հազարավոր հայերի խեղդեցին քարայրներում՝ ծուխ լցնելով փոսերի մեջ, որտեղ նրանք բանտարկել էին հայերին սիրիական անապատներում: Այդպիսով, ստեղծվել են առաջին գազախցիկները»,- գրում է Ֆիսկը:
Նրա խոսքով, Գերմանական կայսերական բանակի կրտսեր անդամները ցեղասպանության ժամանակ մարզվում էին թուրքական բանակում: Ավելին, այդ զինվորները Հիտլերի Վերմախտի շարքերում հայտնվեցին Ուկրաինայում եւ Բելառուսում, որտեղ նրանք օգնում էին հրեաների զանգվածային սպանությունները կազմակերպելու գործում: Կասկած չկա, թե որտեղ են նրանք սովորել այդ անել:
Ֆիսկը պատմել է, որ տարիներ առաջ ինքը «Հայերի Հոլոքոստ» արտահայտությունն օգտագործել է «The Independent»-ի էջերում: Սրբագրիչն անմիջապես մեծատառ Հ-ն փոխարինել է փոքրատառով: «Իմ հեռախոսն անդադար զանգում էր: Հայերը վրդովված էին: Նրանք ցանկանում էին իմանալ, թե ինչո՞ւ իրենք արժանի չեն մեծատառ Հ-ի: Մի՞թե թուրքերը մեծատառ Հ-ի համար բավականաչափ հայերի չեն կոտորել»,- գրում է լրագրողը:
Ֆիսկը գրել է իր խմբագիր Սիմոն Քյոլներին՝ բացատրելով, որ տարբերություն է անցկացնում երկու ցեղասպանությունների միջեւ. ռասիստական մոտեցում, քանի որ չի կարելի տարբերություններ դնել 1.5 եւ 6 մլն թվերի միջեւ: Բացի այդ, ինչպես գրում է հեղինակը, իսրայելցիները, ի տարբերություն Իսրայելի, որը նույնիսկ հայերի ողբերգությունը չի ճանաչում որպես ցեղասպանություն, հայկական ջարդն անվանում են «Հայկական Շոա»՝ օգտագործելով եբրայերեն հոլոքոստ բառը: Հետագայում խմբագիրը նամակը «The Independent»-ում հրապարակել է որպես հոդված, եւ այն մրցանակ է ստացել:
Ավելի վաղ Ռոբերտ Ֆիսկը կրկին բախվել էր այդ խնդրին, երբ սրբագրիչը դարձյալ փոխել էր «Հոլոքոստի» գրությունը՝ կրկին ստորացնելով հայերին: Սակայն, ըստ հեղինակի, կայքի առցանց տարբերակում «մենք հայերին վերադարձրել ենք իրենց մեծատառ Հ-ն»:
http://news.am/arm/news/241899.html