Ձեռքս մեկնեցի հայերին, և նրանք բռնեցին այն. թուրք ռեժիսոր Ֆաթիհ Աքընի հարցազրույցը

Հայոց ցեղասպանության մասին պատմող «The Cut» ֆիլմի ցուցադրությունը Թուրքիայում մեկնարկելու է ուրբաթ:
Մինչ այդ գերմանաբնակ թուրք ռեժիսոր Ֆաթիհ Աքընը հարցազրույց է տվել թուրքական «Միլլիյեթ» թերթի կայքին:
Նա նշել է, որ հայերը դրական են արձագանքել իր ֆիլմին և սեղմել են նրանց ուղղված իր ձեռքը: «Սա թուրք ռեժիսոր է նկարել, ուրեմն բոլոր թուրքերը չէ, որ վատն են»,- Ֆաթիհ Աքընի համոզմամբ՝ հայերն այսպես են մտածում:
Աքընը նշել է, որ այս ֆիլմը Ցեղասպանությունը պատմելու համար չի նկարել:
Ռեժիսորի հետ զրուցած լրագրողը նրան բնութագրում է որպես հանգիստ, հավասարակշռված, առանց բարդույթների մարդ, ով կարողանում է հանգիստ ընդունել իրեն ուղղված քննադատությունը:
Աքընը նշել է, որ մինչև 20 տարեկանը «ցեղասպանություն» բառն անգամ լսած չի եղել: Եվ երբ առաջին անգամ լսել է այդ մասին, առաջին արձագանքը եղել է. «Մե՞նք, թուրքե՞րը, հնարավոր չէ, մենք նման բան անել չէինք կարող, մենք լավ մարդիկ ենք: Մեր ընտանիքում էլ մոտեցնում այդ կերպ էր»:
Ավելին՝ Ֆաթիհ Աքընի հայրը թուրք ազգայնական է՝ Ազգայնական շարժում կամ, այլ կերպ ասած, «գորշ գայլերի» կուսակցության անդամ:
«Թեմայի առնչությամբ շատ զգայուն էին, ագրեսիվ, խուճապահար վարք տեսա: Դա հետաքրքրեց անշուշտ: Մտածեցի՝ այստեղ արգելված բան կա, խորհրդավորություն կա, մի բան կա, որը չգիտեմ: Ես էլ հետաքրքրասեր մարդ եմ, հատկապես՝ այդ տարիքում: Դրանից հետո կարդացի գտածս բոլոր գրքերը՝ նաև Ցեղապսանությունը ժխտողներինը: Բոլորը կարդացի»,- ասել է նա:
Ավելի ուշ թե՛ մայրը, թե՛ հայրը հավանել են այդ ֆիլմը:
Աքընը նշել է, որ իրեն շատերն են խորհուրդ տվել չանդրադառնալ այդ թեմային:
«Ասում էին՝ մի՛ արա, գլխիդ գործ կբացես: Սակայն սա իմ կյանքն է, իմ որոշումներն են: Իհարկե, նաև կարևոր է այն, թե ինչպես կընդունեն դիմացիններս: Ֆիլմի թիրախում հետևյալ խնդիրն է՝ «նրանք են մեզ սպանել» ասող թուրք հանդիսատեսի կարծիքը փոխելը: Ֆիլմն այդպես էր կառուցված: Որոշակի պահից հետո մոռանում ես, որ նրանք քրիստոնյա են, հայ են: Մի հայր է, որը զավակներին է փնտրում»,-ասել է նա:
Աքընը նաև նշել է, որ իր ֆիլմին դեմ արտահայտվողներ շատ կան, բայց նրանք ֆիլմը չդիտողներն են:
«Դա ռեֆլեքս է, իսկ ֆիլմի իրական նպատակը քննարկում սկսելն է: Ֆիլմի հիմքում խոսքի ազատությունն է: Լավ, դու այն ցեղասպանություն մի կոչիր, այսպես կոչված ցեղասպանություն ասա, կամ տեղահանություն: Ես մտածում եմ, որ դա Ցեղասպանություն էր: Իմ իրավունքը մի՛ ոտնահարիր»,- ասել է նա:
Հարցին, թե նման ֆիլմը որպես Թուրքիայի դեմ իրականացված թշնամանք ընկալողները շա՞տ են արդյոք, Աքընը պատասխանել է. «Իրականում ճիշտ հակառակը տեղի ունեցավ: Այս ֆիլմի վրա աշխատելու ընթացքում որոշակի խտրականության հանդիպեցի: Տարբեր հայերի հետ հանդիպեցի: Հայերի որոշ խմբեր շոկ էին ապրում՝ իմանալով, որ թուրք եմ։ Հարցնում էին՝ քրիստոնյա՞ եմ, պատասխանում էի՝ ոչ: Սառն էին վերաբերվում: Հետաքրքիր էր, որ շատերն ինձ անտեսում էին, քանի որ մայրս ու հայրս թուրք են: Սակայն ֆիլմս ողջ աշխարհի հայերը շատ հավանեցին ու դրական են արձագանքում: Նրանց ձեռք եմ մեկնել, և հայերը բռնել են իրենց ուղղված իմ ձեռքը»:
Հեղինակը, սակայն նշել է, որ իր ֆիլմն Արևմուտքում չեն հավանել:

http://www.tert.am/am/news/2014/12/01/akin-the-cut/