Դերսիմը չի ընդունել Դավութօղլուին

Թուրքիայի Թունջելի (Դերսիմ) նահանգում երկրի վարչապետ Ահմեդ Դավութօղլուին բողոքի ցույցերով են դիմավորել: Նոյեմբերի 23-ին Թուրքիայի վարչապետը մեկնել էր Թունջելի՝ կառավարող Արդարություն և զարգացում կուսակցության (ԱԶԿ) նահանգային կառույցի ժողովին մասնակցելու նպատակով:
Դերսիմում, որի բնակչության մեծ մասը ալևի է [ալևիականությունն ընդունված է համարել իսլամի շիա ուղղության մի ճյուղ – ՍիվիլՆեթ] և համակրանք չի տածում իսլամամետ ԱԶԿ-ի քաղաքականության հանդեպ, ըստ լրատվամիջոցների, լավ չեն ընդունել Դավութօղլուին. Դերսիմի հրապարակում նրա այցի դեմ բողոքի ցույց է կազմակերպվել:
Ըստ թուրքական Demokrat Haber կայքի` շուրջ 300 ցուցարարներ Դավութօղլուի դեմ հնչեցրել են «Հեռացի՛ր Դերսիմից», «Գեզիի նահատակները անմահ են» և այլ կարգախոսներ: Թուրքիայի անվտանգության ծառայության տվյալներով՝ Գեզի այգու ցույցերի ժամանակ սպանված ցուցարարների մեծ մասը ալևի է եղել։
Դերսիմի նահանգապետարանում կայացած հանդիպմանը մասնակցելուց հետո Դավութօղլուն այցելել է քաղաքի կենտրոնում գտնվող ալևիական աղոթատուն՝ ջեմէվի:
Ցուցարարները քայլերթ են կազմակերպել դեպի Դերսիմի քաղաքապետարան, որը պետք է լիներ Դավութօղլուի հաջորդ կանգառը: Դերսիմի հարակից բնակավայրերից տեղափոխված շուրջ 1500 ոստիկաններից բաղկացած խմբերը թույլ չեն տվել ցուցարարներին շարժվել դեպի քաղաքապետարան և ակցիայի մասնակիցների դեմ կիրառել են արցունքաբեր գազ: Ոստիկանությանը հաջողվել է ժամանակավորապես ցրել ցուցը, սական ցուցարարները նորից են հավաքվել: Ըստ թուրքական լրատվամիջոցների` բողոքի ցույցի պատճառով Դավութօղլուն չեղյալ է հայտարարել Դերսիմի քաղապետարան նախատեսված այցը:
Anadolu պետական լրատվական գործակալությունը, անդրադառնալով վարչապետի դերսիմյան այցին, լռում է տեղի ունեցած ցույցի մասին: Դրա փոխարեն Anadolu-ն հրապարակել է Դերսիմի նահանգապետարանում Դավութօղլուի ելույթը: Խոսելով Դերսիմի 1937-1938 թթ. իրադարձությունների մասին` Դավութօղլուն ասել է, որ իրենք առերեսվում են պատմության հետ:
«Այո՛, ձեր նկատմամբ զուլում է տեղի ունեցել»,- ասել է Դավութօղլուն:
Թուրքիայի կառավարության ղեկավարը հույս է հայտնել, որ 2015թ. խորհրդարանական ընտրություններին իրենց կուսակցությանը Դերսիմում շատ ձայներ կհավաքի:
1937-1938թթ. Դերսիմի իրադարձությունների ժամանակ թուրքական բանակի ռազմական գործողությունների հետևանքով հազարավոր դերսիմցիներ են սպանվել, մի քանի հազարը տարհանվել և վերաբնակեցվել են Թուրքիայի այլ վայրերում: Դրանով Թուրքիան փորձում էր հնազանդեցնել դեռ օսմանյան ժամակաշրջանից ըմբոստ բնակավայրի համբավ ունեցող Դերսիմը:
Թեև Դերսիմի կոտորածը տեղի է ունեցել Մուստաֆա Քեմալի գլխավորած Ժողովրդահանրապետական կուսակցության տարիներին, ալևիները նախընտրում են իրենց ձայնը տալ քեմալականներին, բայց ոչ երբեք՝ իսլամամետ ԱԶԿ-ին, որը, ըստ նրանց, ծայրահեղ է և անհանդուրժող:
http://civilnet.am/2014/11/24/davutoglu-dersim-visit-protest-cemevi/#.VHREQ9KsV4I