Թուրքիայում Հայոց ցեղասպանության մասին ներկայացում է բեմադրվելու

Հայոց ցեղասպանության 100-ամյակին՝ 2015թ. ընդառաջ ռեժիսոր Նիհաթ Մուրշիթփընարը սկսել է հայերի տեղահանության և կոտորածների մասին պատմող պիեսի բեմադրությունը, որի հեղինակն Օզգյուր Օզջանն է:
Վերջինս խոսել է իր իսկ գրած ստեղծագործության մասին և նշել, որ այն բեմ է բարձրանալու 2015թ.:
Խոսելով իր ստեղծագործության մասին՝ նա նշել է, որ Թուրքիայում ազգային փոքրամասնությունների խնդիրները 1915թ. չեն սկսվել ու ավարտվել: Դրանք շարունակվում են մինչ այժմ:
«Պիեսը գրելիս փորձել եմ գտնել պատասխանն ու հանդիսատեսից հարցնել, թե ի՞նչ է փոխվել, ու ի՞նչ չի փոխվել անցած 100 տարիների ընթացքում: Կոտորածները տեսնելով՝ լուռ մնացած մարդիկ կոտորողների չափ հանցավոր են»,- ասել է նա։
Պիեսում հայրենիքից հեռանալ հարկադրվածները հանդիպում են արտերկրում՝ Անդո քեռու մոտ:
Նա նշել է, թե ինչ դժվարությունների են հանդիպում պիեսը ցուցադրելու համար բեմ գտնելու հարցում:
«Մարդիկ մտածում են, որ դրանով իրենց կառույցները վտանգի տակ կդնեն: Այն, որ պիեսը հայերի և 1915թ. մասին է և բեմադրվելու է 2015թ.՝ ջարդերի 100-ամյակին, մարդկանց կաշկանդում է: Դեռ բեմ ենք փնտրում: Մեր ներկայացումը նաև հայերեն է թարգմանվելու»,-ասել է նա:
http://www.tert.am/am/news/2014/11/19/ozcan/