Ստամբուլի հունական մասնավոր դպրոցն իր 560-ամյակն է նշում

Ստամբուլի Ֆեների հունական մասնավոր ավագ դպրոցը և նախակրթարանը, որտեղ շարունակում է ուսանել 53 աշակերտ, այս տարի նշում է իր 560-ամյակը:
Առաջին կին տնօրեն Վիկտորիա Լեմոպունոն, որը 26 տարի շարունակ կատարում է իր պարտականությունները, թուրքական «Անադոլու» լրատվական գործակալության տված հարցազրույցում ասել է. «Ստամբուլում հույների նվազելու հետևանքով աշակերտների թիվը նույնպես փոքրացել է, բայց, այնուամենայնիվ, դպրոցը մեծ հաջողություններ է գրանցում»:
Ֆեների մասնավոր հունական ավագ դպրոցի շենքը կառուցվել է 1881 թվականին, Կոստանդին Դիմադիս ճարտարապետի կողմից, Ստամբուլի` հույներով բնակեցված Ֆեներ թաղամասում:
Ֆեներում տարբեր կրթական անուններով գործող դպրոցը 1804թ-ին տեղափոխվել է Քուրուչեշիմե թաղամաս, իսկ 1850թ-ին կրկին հետ է վերադարձվել Ֆեներ:
Իոակիմ 3-րդ պատրիարքի օրոք դպրոցը համալսարան դարձնելու ծրագրեր են մշակվել, բայց դրական արդյունքի հասնել չեն կարողացել:
Նյութը պատրաստեց Նադյա Հովհաննիսյանը
AllTurkey.am