Մահչուփյանի նշանակումը կջրե մյուս անհարթությունները. Արամ արքեպիսկոպոս Աթեշյան

Պոլսո Հայոց պատրիարքական ընդհանուր փոխանորդ Արամ արքեպիսկոպոս Աթեշյանը կարծում է, որ Թուրքիայի վարչապետի գլխավոր խորհրդականի պաշտոնում պոլսահայ լրագրող Էթյեն Մահչուփյանի նշանակումը դրական կազդի երկու երկրների հարաբերությունների վրա: Այս մասին նոյեմբերի 11-ին NEWS.am-ի հետ զրույցում ասաց Արամ արքեպիսկոպոս Աթեշյանը, որը Մայր Աթոռ Սուրբ Էջմիածնում մասնակցում էր Եպիսկոպոսաց երկրորդ ժողովին:
«Այն, որ կառավարությունն առաջին անգամ է, որ հայ կընտրի որպես ավագ խորհրդատու, դա մեզ համար ուրախություն է, որովհետեւ մեր համայնքի զավակներից ոչ մեկ մինչեւ այժմ նման պաշտոնի չի եղել: Երբ մի կողմից հայության անունը կվարկաբեկեն, մյուս կողմից կառավարությունը հայը կառնի իր քովը որպես գործակից, սա կջրե մյուս անհարթությունները, խոսակցությունները կամ անարդարությունները: Հետեւաբար՝ կկարծեմ, որ Էթյեն Մահչուփյանը լավ դեր պիտի կատարե երկու ժողովուրդների միջեւ եղած տարակարծությունների կապակցությամբ: Կմաղթենք, որ ինքն իսկապես դրական կեցվածք ունենա եւ դրական արդյունք ունենա պոլսահայության համար»,-ասաց Արամ արքեպիսկոպոս Աթեշյանը:
Հիշեցնենք, որ թուրքական Sabah պարբերականը գրել էր, որ Թուրքիայի վարչապետ Ահմեդ Դավութօղլուն հոկտեմբերին կայացած՝ Թուրքիայի հայտնի մտավորականների հետ հանդիպման ժամանակ վարչապետի գլխավոր խորհրդականի պաշտոնն էր առաջարկել Էթյեն Մահչուփյանին եւ դրական պատասխան ստացել: Դավութօղլուն Մահչուփյանի հրամանը ստորագրելու որոշման մեջ շեշտել էր, որ նա աչքի է ընկել Թուրքիայի ժողովրդավարացման, քաղաքացիական հասարակության եւ պետության նկատմամբ իր վերաբերմունքով:
http://news.am/arm/news/238724.html