Թուրք քաղաքապետը ցանկանում է վերականգնել հայկական եկեղեցին, որի վրա մանկության տարիներին քար է նետել

1914թ. 9.850 բնակիչ ունեցող Բալուում 5.250 հայ էր բնակվում: Այստեղ 5 եկեղեցի և 4 դպրոց կար, որոնք ժամանակի ընթացքում ավերակների են վերածվել: Բալուի քաղաքապետ Մեհմեթ Սայիթ Դաղօղլուն արդեն երկար ժամանակ է՝ աշխատում է այդ եկեղեցիներից մեկը (Սուրբ Լուսավորիչ եկեղեցին-Ակունքի խմբ) ու մի մզկիթ վերակառուցելու ուղղությամբ, գրում է «Ակօս»-ը:
Նա պատմում է, որ մինչև 1970-ականները կանգուն եկեղեցին գանձ որոնողների թիրախ է դարձել և բախտի քմահաճույքին հանձնվել:
«Երբ ես փոքր էի, այնտեղ քար գցելը սովորություն էր: Իմ մանկությունն այդպես եմ հիշում: Ասում էին՝ եթե այնտեղ քար նետես, դրախտին մեկ քայլ ավելի կմոտենաս: Ավերվեց: Ավելի ուշ պատմության ու մշակույթի հանդեպ գոնե մի փոքր հարգանք չունեցող գանձ որոնողների թիրախում հայտնվեց: Անցյալում տեղի ունեցածները մենք չենք արել: Անողները թող ամաչեն»,-«Ակօս»-ին ասել է նա:
Դաղօղլուն նշել է, թե եկեղեցու գլուխը խոնարհված տեսնել այլևս չի ցանկանում և դրա վերակառուցման համար Պոլսո հայոց պատրիարքարանի և Եվրոպայում բնակվող բալվեցիների աջակցությունն է խնդրել:
«Մի քիչ պատրիարքարանը կօգնի, մի քիչ մեր եվրոպաբնակ համաքաղաքացիները, մի քիչ էլ մենք, և եկեղեցին միացյալ ուժերով նախկին տեսքին կվերադարձնենք»,- հույս ունի քաղաքապետը:
Նա տեղեկացրել է, որ եկեղեցու սեփականատիրության վկայականի հարցը լուծելուց հետո վերակառուցման աշխատանքները կմեկնարկեն 2015թ.:
Դաղօղլուն կարևորել է եկեղեցու վերաբացումը հավատացյալների համար:
«Մեր պապերը դարերով միասին են ապրել: Ցանկացողը մզկիթ է գնացել, ցանկացողը՝ եկեղեցի: Դա խնդրահարույց չի լինի: Մենք խոսում ենք 8 դար պատմություն ունեցող եկեղեցուց: Գուցե այն արդեն մեկ դար է` չի գործում, սակայն 700 տարի ծառայել է հավատացյալներին… Աստծո կամոք մեր հայ հարևանների հետ կհանդիպենք Բալուում»,-ասել է նա:
http://www.tert.am/am/news/2014/11/11/balu-church/