Նախարար. Մեծ Բրիտանիան կողմ է հայ-թուրքական արձանագրությունների կյանքի կոչմանը

Մեծ Բրիտանիան կարծում է, որ նախկինում ստորագրված հայ-թուրքական արձանագրությունները պետք է կյանքի կոչվեն: Այս մասին նոյեմբերի 3-ին ՀՀ արտգործնախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարել է Բրիտանիայի` Եվրոպայի հարցերով պետնախարար Դեյվիդ Լիդինգթոնը:
Ըստ նրա` պաշտոնական Լոնդոնը կողմ է Հայաստանի եւ Թուրքիայի հարաբերությունների կարգավորմանը: Ընդ որում, նախարարը դրական է գնահատել Ռեջեփ Թայիփ Էրդողանի երդման արարողությանը ՀՀ արտգործնախարար Էդվարդ Նալբանդյանի ներկայությունը: Լիդինգթոնը նշել է, որ հայ-թուրքական արձանագրությունները հնարավորություն են տալիս առաջ շարժվել:
Հիշեցնենք, որ Հայաստանի եւ Թուրքիայի միջեւ դիվանագիտական հարաբերությունների հաստատման եւ հարաբերությունների զարգացման վերաբերյալ արձանագրությունները սառեցվել էին թուրքական կողմի դիրքորոշման հետեւանքով, որը դրանց իրագործման նախապայմաններ էր ներկայացրել:
http://news.am/arm/news/237315.html