Էրդողանն ասել է, թե Հայաստանն անպատասխան է թողել իրենց «բարի մտադրությունները»

Թուրքիայի նախագահ Ռեջեփ Թայիփ Էրդողանը Ֆրանսիա կատարած այցի ընթացքում ելույթ է ունեցել Ֆրանսիայի Միջազգային հարաբերությունների ինստիտուտում և հայտարարել է, թե Հայաստանի հետ հարաբերությունների զարգացման համար իրենք քայլեր են ձեռնարկել, սակայն իրենց «բարի մտադրություններն» անպատասխան են մնացել:
«2015թ., այսինքն` 1915թ. դեպքերի տարելիցին, մենք շարունակելու ենք ջանքեր գործադրել, որ աշխարհն իմանա իրականությունը: Կասկած չկա, որ այս հարցում ոչ թե հորինված կամ գաղափարախոսության գերի ու քաղաքական թեմա դարձած պատմությունն է հաղթելու, այլ իրական պատմությունը»,- հայտարարել է Էրդողանը:
Նա նշել է, որ Թուրքիայի դեմ տարիներ շարունակ ճնշում է գործադրվում տարբեր հարցերում, այդ թվում` 1915թ. առնչությամբ:
«Չնայած մեր կառուցողական մոտեցմանը՝ Հայաստանն ու հայկական սփյուռքը ողջախոհ մոտեցում չեն ցուցաբերում այդ հարցը քաղաքական հարց չդարձնելու, այն պատմաբանների թողնելու հարցում: Թողնենք պատմաբաններին»,- արդեն ավանդական դարձած առաջարկը կրկնել է Էրդողանը:
Նա դարձյալ հայտարարել է, թե իրենք բացել են արխիվները, որտեղ միլիոնից ավելի փաստաթղթեր կան:
«Եթե Հայաստանն էլ նման արխիվ ունի, թող բացի, երրորդ երկրներն էլ եթե ունեն, թող բացեն, և այդ փաստաթղթերի հիման վրա պատմաբանները թող աշխատեն, հնագետները թող աշխատեն, իրավագետները, քաղաքագետները: Նրանց արած բացահայտումների հիման վրա շարժվենք: Հայաստանի հետ հարաբերությունների զարգացման համար ձեռք պարզողը դարձյալ մենք եղանք, սակայն մեր բարի կամքը, ցավոք, պատասխան չստացավ»,-ասել է Թուրքիայի նախագահը:
http://www.tert.am/am/news/2014/11/01/erdogan-2015/