Թուրք նահանգապետը թույլ չի տալիս Բիթլիսի փողոցներից մեկը կոչել Սարոյանի անունով

Լոնդոնի Կոմիտաս ինստիտուտի տնօրեն Արա Սարաֆյանը հայտարարել է, թե Բիթլիսի (Բաղեշ-Ակունքի խմբ.) նահանգապետ Օրհան Օզթուրքը չի հաստատում Բիթլիսի ավագանու կողմից ընդունած՝ փողոցներից մեկը ամերիկահայ հայտնի գրող Վիլյամ Սարոյանի անունով կոչելու որոշումը։
Ինչպես տեղեկացնում է Ստամբուլի հայկական «Ակօս»-ը, Լոնդոնի Կոմիտաս ինստիտուտի տնօրեն Արա Սարաֆյանը նշել է, թե Բիթլիսի նահանգապետը դեմ է Բիթլիսում տեսնել Վիլյամ Սարոյանի անունով փողոց՝ պնդելով, թե Սարոյանը որեւէ կապ չունի Բիթլիսի հետ։ Արա Սարաֆյանը շեշտել է, թ այս տեղեկությունն իրեն է փոխանցել Բիթլիսի քաղաքապետը։
Իր հերթին Բիթլիսի քաղաքապետ Նեւին Դաշդեմիր Դաղքըրանը պնդել է, թե ինքը նման բան չի ասել Սարաֆյանին, իսկ նահանգապետից էլ փողոցի անվան հետ կապված որեւէ առարկություն չի տեսել։ Դաղքըրանը նշել է, թե փողոցը վերջնականապես Վիլյամ Սարոյանի անունով անվանակոչելու համար անհրաժեշտ է բացի քրդական Խաղաղություն եւ ժողովրդավարություն կուսակցության անդամներից` նաեւ մեկ իշխող կուսակցության անդամի ձայնը։
Նշենք, որ Բիթլիսի քաղաքային ավագանին այս տարվա օգոստոսին որոշում էր կայացրել Բիթլիսի այն փողոցը, որտեղ ապրել է Վիլյամ Սարոյանի ընտանիքը, կոչել Վիլյամ Սարոյանի անունով։
http://news.am/arm/news/236842.html