Դինքի դեմ պատրաստվող մահափորձի մասին տեղյակ եղած պաշտոնյաներին պահանջվում է դատապարտել 20-25 տարվա ազատազրկման

«Ակօս» թերթի խմբագրապետ Հրանտ Դինքի սպանությունից 8 տարի է անցել, սակայն նրա սպանության գործով շրջանառվող պաշտոնյաներից ոչ մեկին լուրջ մեղադրանք չի առաջադրվել, գրում է «Ակօս»-ը:
Արդարադատության նախարարության՝ որոշ պաշտոնյաների հանդեպ քննություն սկսելու որոշումից հետո այդ մարդկանց դատելու հարցում որևէ իրավական խոչընդոտ չի մնացել:
Դինքի ընտանիքի փաստաբաններն այժմ պահանջում են նրանց դեմ գործ հարուցել՝ Թուրքիայի Քրեական օրենսգրքի 83-րդ հոդվածի հատկանիշներով. այն է՝ կանխամտածված սպանության իրականացում՝ անփույթ վերաբերմունքի հետևանքով:
Հրանտ Դինքի սպանության ժամանակահատվածում ոստիկանության և ժանդարմերիայի պաշտոնյաների՝ պատասխանատվության ենթարկվելու համար պայքարը շարունակվում է:
Չնայած դատախազության կողմից քննություն սկսելու համար որևէ արգելք չկա, սակայն Ստամբուլի այդ ժամանակվա նահանգապետ Մուամմեր Գյուլերը, Ստամբուլի ոստիկանապետ Ջելալեթթին Ջերրահը, Ստամբուլի փոխնահանգապետ Էրգուն Գյունգյորը, հետախուզության վարչության պետ Ռամազան Աքյուրեքը, Տրապիզոնի ժանդարմերիայի հրամանատար Ալի Օզը և այլ պաշտոնյաներ մինչ այժմ որևէ անգամ լրջորեն չեն հարցաքննվել:
Մինչ շարունակվում էր Դինքի սպանության գործով դատավարությունը, Մարդու իրավունքների եվրոպական դատարանը, ընդունելով Դինքի ընտանիքի փաստաբանների դիմումը, դատապարտել էր Թուրքիային:
ՄԻԵԴ-ի վճռով՝ Դինքի կյանքը համապատասխան պատկան մարմինները չեն փորձել պաշտպանել, և բավարար քննություն չեն իրականացրել՝ մատնանշելով պաշտոնյաներին:
Դինքի ընտանիքի փաստաբաններից Հաքան Բաքըրջըօղլուն նշում է, որ ՄԻԵԴ-ը պարզել է, որ պատկան մարմինները Դինքի սպանությունը կանխելու համար քայլեր չեն ձեռնարկել, և նրանք պետք է պատասխանատվության ենթարկվեն՝ Քրեական օրենսգրքի 83-րդ հոդվածով:
Եթե նրանց դեմ գործ հարուցվի օրենքի այդ կետով, ապա այդ պաշտոնյաներին 20-25 տարվա ազատազրկում է սպառնում:
Բաքըրջըօղլուն նշում է, որ Դինքի սպանության վերաբերյալ թուրքական հետախուզությունը տվյալներ ունեցել է, սակայն որևէ քայլ չի ձեռնարկել, և դա արել է կանխամտածված:
«Տրապիզոնի ոստիկանությունը 2006թ. փետրվարի 15-ին մի փաստաթուղթ է պատրաստել, որում նշվում է. «գործողություն է իրականացվելու, նա սպանությունն իրականացնելու հարցում վճռական է և ի վիճակի է դա անել»:
Սպանության իրականացումից հետո Հետախուզական ծառայության պետ Ռամազան Աքյուրեքը նման արտահայտություն է արել. «Երբ իմացա սպանության մասին, ասացի, որ դա Յասին Հայալն է իրականացրել, նրան անհապաղ գտնեն և մոտս բերեն»:
«Ամեն ինչ այնքան հստակ է: Այդ տեղեկությունն իմացել է հետախուզական ծառայությունը: Նույն բանը նաև Տրապիզոնի ժանդարմերիայի մասին կարելի է ասել: Տեղեկությունն իմացել են, սակայն որևէ քայլ չեն ձեռնարկել»,-ասում է Բաքըրջըօղլուն:
http://www.tert.am/am/news/2014/10/30/dink-20-25/