Տիգրանակերտի քաղաքապետը Երևանում է, այցելել է Ցեղասպանության թանգարան

Առաջին անգամ Երեւանում է Տիգրանակերտի (Դիարբեքիրի) քաղաքապետ Օսման Բայդեմիրը: Նա այստեղ է՝ իրականացնելու իր տարիների երազանքը` լինել Հայաստանի հանրային ռադիոընկերությունում եւ այցելել Ցեղասպանության թանգարան: Այդ մասին հայտնում է Երկիր Մեդիան:
Տիգրանակերտից Հայաստան ժամանած պատվիրակությունն այսօր փոքրիկ շրջայց է կատարել ռադիոյի շենքում, ծանոթացել քրդերեն հաղորդումների բաժնի աշխատանքին: «Ամբողջ կյանքիս երազանքն էր` մինչեւ մահս լինել Երեւանի ռադիոյում եւ Ցեղասպանության թանգարանում: Ես այսօր իրականացնում եմ իմ երազած ճամփորդությունը: Որպես քուրդ ժողովրդի զավակ` ես պարտավոր էի լինել այստեղ եւ բարեկամության ձեռք մեկնել հայ ժողովրդին: Երեւանի ռադիոն քրդերեն հաղորդում հեռարձակած առաջին պետական ռադիոն է: Երբ սկսվեցին հաղորդումները, քրդական մշակույթն ու երաժշտությունն այլուր արգելված էին: Երեւանի ռադիոյի ստեղծած կամուրջը կենսական աղբյուր էր քուրդ ժողովրդի համար: Եվ այսօր հերթը մերն է, ուզում ենք անցյալում տեղի ունեցած ողբերգությունների սպիները մեղմացնող քայլեր անել: Այդ քայլերից մեկը Տիգրանակերտում Սուրբ Կիրակոս եկեղեցու վերանորոգումն էր, ապա նաեւ հայերենի դասընթացների կազմակերպումը»,- ասել է Տիգրանակերտի՝ ազգությամբ քուրդ քաղաքապետը:
http://www.yerkir.am/am/news/74991.htm