Թուրքիայի թշնամիներին թվարկելու հարցում Դավութօղլուի խոսքերի տակ չպետք է ենթատեքստեր փնտրել. Լևոն Հովսեփյան

Թուրքիայի վարչապետ Ահմեթ Դավութօղլուն, BBC-ին տված հարցազրույցում թվարկելով Թուրքիայի թշնամիներին, Հայաստանը չէր նշել:
«Դավութօղլուն թվարկել է այն մարտահրավերներն ու հիմնախնդիրները, որոնք առաջնահերթ են Թուրքիայի շահերի տեսանկյունից՝ Ասադի ռեժիմ, Իսլամական պետություն, քրդեր: Այս երեքի հետ կապված՝ Թուրքիան գործընթացների մեջ է և փորձում է առավելապես այդ ուղղությամբ կենտրոնանալ: Այսինքն՝ այսօր Թուրքիային հուզում են այդ խնդիրները և դրանց միջոցով իրականացվելիք քաղաքական, ռազմաքաղաքական գործընթացները»,-Tert.am-ի հետ զրույցում մեկնաբանելով Թուրքիայի վարչապետի հարցազրույցը՝ ասաց թուրքագետ Լևոն Հովսեփյանը:
Նշենք, որ Դավութօղլուն իր հարցազրույցում, մասնավորապես, նշել էր. «Երեք խումբ կա, որոնց չենք ցանկանա տեսնել մեր սահմանին՝ սիրիական ռեժիմը, «Իսլամական պետությունը» և Քրդական աշխատավորական կուսակցությունը: Դրանք բոլորը մեր թշնամիներն են»:
Իսկ ինչ վերաբերում է Հայաստանին, ապա ըստ թուրքագետի՝ պետք չէ ինչ-որ բան փնտրել. «Սա նմանվում է 2010 թվականին, երբ Թուրքիայում վերախմբագրման ենթարկվեց ազգային անվտանգության փաստաթուղթը: Թուրքական մամուլի սխալ մեկնաբանության հետևանքով գրված էր, թե Հայաստանը հանվել է այդ փաստաթղթից, և տարբեր մեկնաբանություններ եղան՝ այն դեպքում, երբ դա փակ փաստաթուղթ է, և դրա հետ կապված՝ որևէ իրական փաստ չկար»,-նշեց Լևոն Հովսեփյանը՝ հավելելով. «Նույնը հիմա է, և Դավութօղլուի խոսքերի տակ չպետք է ենթատեքստեր փնտրել»:
http://www.tert.am/am/news/2014/10/29/armenia-hovsepyan/