Իշլեր. Դավութօղլուի եւ Էրդողանի կանայք բարձր են գնահատում հայ ոսկերիչներին

Թուրքիայի առաջին դեմքերի կանայք բարձր են գնահատում ստամբուլահայերի ոսկերչական աշխատանքը: Այդ մասին NEWS.am-ի թղթակցին հայտնել է Ստամբուլի ոսկերիչների պալատի նախագահ, ծագումով հայ Նորայր Իշլերը:

Նրա խոսքով՝ հայ ոսկերիչները պարբերաբար պատվերներ են իրականացնում, այդ թվում նաեւ Ռեջեփ Թայիփ Էրդողանի եւ Ահմեդ Դավութօղլու կանանց, իսկ ամենից բարձր նրանց աշխատանքը գնահատում է Հայրունիսա Գյուլը՝ նախկին նախագահ Աբդուլա Գյուլի կինը: «Հայերին նրանք շատ լավ են վերաբերում»,- հավելեց Իշլերը:
Նկատենք, որ մի քանի տարի առաջ ելույթներից մեկի ժամանակ Գյուլի կինը հայտարարեց, որ իր մատանին Սեւան Բիչակչիի աշխատանքն է: Բիչակչին միջազգային հեղինակավոր մրցանակների դափնեկիր է, այդ թվում «Town and Country Couture Award»-ը, որը նա մի քանի տարի անընդմեջ ստացել է:
«Բիչակչին անկրկնելի է: Եվ նա միակը չէ. առանց չափազանցության, նրա նման Ստամբուլի հայ ոսկերիչների շրջանում մոտ 20 հոգի կա: Նրանք աշխատում են հատուկ եւ հայտնի անձանց համար, սակայն աստղային հիվանդությամբ չեն տառապում. Նրանք ամենահասարակ մարդիկ են»,- ժպիտով հավելել է Իշլերի օգնական Րաֆֆի Էրմոն Արաքսը:
http://news.am/arm/news/236066.html