Ստամբուլի քաղաքապետարանը հայերին պատկանող տարածքը չվերադարձնելու համար այն զբոսայգու է վերածել

1974 թվականին Թուրքիայի հայ համայնքից բռնազավթված տարածքը, որտեղ այժմ մարզահամալիր և ավտոկայանատեղի է գտնվում, 2014թ.-ի հունվարի 22-ին վերադարձվել էր Սուրբ Փրկիչ հայկական եկեղեցու հիմնադրամին:
Ինչպես տեղեկացնում է «Ակօս»-ը, 40 տարվա ընդմիջումից հետո հիմնադրամը ստացել էր տարածքի սեփականության վկայականը:
Սակայն դրանից հետո Զեյթինբուրնուի համայնքապետարանն սկսել էր ջանքեր գործադրել տարածքը հայերին չվերադարձնելու համար:
Այն մոտ 8.000 քառակուսի մետր տարածքը զբոսայգու վերածելու պահանջով դիմել էր Ստամբուլի քաղաքապետարան, որտեղ էլ փոփոխություն էր տեղի ունեցել, և այն զբոսայգու տարածք էր անվանվել:
Սուրբ Փրկիչ հիմնադրամն ընդդիմացել էր քաղաքապետարանի այս որոշմանը: Հիմնադրանի ղեկավար խորհրդի տարածած հաղորդագրության մեջ նշվում է, որ այդ տարածքը մինչև իրենց վերադարձվելն առևտրային տարածք է եղել և փոփոխության է ենթարկվել իրենց վերադարձնելուց հետո:
Հիմնադրամի փաստաբան Ալի Էլբեյօղլուն պնդում է, որ քաղաքապետարանի այդ քայլն անօրինական է, և իրենք պատրաստվում են դատարան դիմել:
http://www.tert.am/am/news/2014/10/25/zeytinburnu-park/