Չնայած Դինքի սպանության հետաքննությունը վերսկսվելու է, նրա ընկերը դատավարության հետ կապված սպասելիքներ չունի

Հրանտ Դինքի ընկերը՝ Տիրան Լոքմագյոզյանը, հույս չունի, որ Թուրքիայի դատարանը կամ որևէ հետաքննություն լույս կսփռի Հրանտ Դինքի մահվան հանգամանքների վրա:
Tert.am-ի հետ զրույցում Տիրան Լոքմագյոզյանը ավելացրեց. «Միշտ էլ այն կարծիքին եմ եղել, որ դատավարության արդյունքում ոչ մի բան չի լինի»:
Նշենք, որ «Ազատություն» ռադիոկայանը տեղեկացրել էր, որ Հրանտ Դինքի սպանության գործի որոշ առանցքային դրվագների հետաքննությունը վերսկսվելու է՝ Թուրքիայի արդարադատության նախարարության թույլատվությամբ:
Խոսքը Դինքի սպանությանը նախորդած շրջանում բարձրաստիճան 9 թուրք պաշտոնյայի գործողությունների, ավելի ճիշտ՝ նրանց անգործության մասին է, քանի որ ըստ Հրանտ Դինքի իրավահաջորդների շահերը ներկայացնող փաստաբանների՝ հստակ օպերատիվ տեղեկությունների էին տիրապետում առ այն, որ հայտնի ստամբուլահայ լրագրողի դեմ մահափորձ է նախապատրաստվում, սակայն որևէ կանխարգելիչ քայլ այդպես էլ չէին ձեռնարկում:
http://www.tert.am/am/news/2014/10/23/armenia-dinq/