Թուրք հոդվածագիրն առաջարկում է 2015-ին ընդառաջ վերակառուցել Անին և դյուրացնել հայերի մուտքը քաղաք

Թուրքական Star թերթում հրապարակված Ռեջեփ Գյուվելիօղլուի հոդվածում նշվում է, որ 2015թ. ընդառաջ օրակարգում շարունակելու է մնալ Հայոց ցեղասպանության հարցը:
Հոդվածագիրը թուրքական կառավարությանը խորհուրդ է տալիս ուշադրության կենտրոնում պահել Հայաստանից Թուրքիա արտագնա աշխատանքի մեկնած հայերին և վերակառուցել Անին:
Հոդվածը ներկայացնում ենք մասնակի կրճատումներով.
«Առանց ցեղասպանությունը ճանաչելու հնարավոր է որոշ քայլեր անել, որոնք, եթե շարունակական լինեն, Թուրքիայի մասին լավ տպավորություն կստեղծեն:
Դա երկու ուղղությամբ կարելի է անել. առաջինն այն է, որ Հայաստանից աշխատելու նպատակով Թուրքիա եկած հայերի համար հնարավորություններ ստեղծվեն:
Մեր հայ քաղաքացիների հարցից առհասարակ խոսելն ավելորդ է: Ինչպես որ ես եմ, ինչպես որ մեր նախագահն է, նույն կերպ էլ նրանք են այս հայրենիքի քաղաքացիները:
Իմ երկրորդ խորհուրդը փոքր-ինչ տարբեր է:
Անին հայերի համար հավատքի կենտրոն է: Անին մեզ համար էլ է կարևոր:
Տարիներ շարունակ ավերված Անին Հայաստանի սահմանին է:
Ինչպես որ Թուրքիան արեց Աղթամարի դեպքում, Անին էլ կարճ ժամանակահատվածում և միջազգային խորհրդատուների ու օտարերկրացի վերակառուցող ընկերությունների մասնակցությամբ պետք է վերակառուցվի:
Անիի շինությունների վերակենդանացումից հետո այս քաղաքը պետք է բաց լինի հայերի համար, և այնտեղ մտնելու և իրենց հոգևոր արժեքները տեսնելու համար նրանցից մուտքի արտոնագիր կամ անձնագիր չպետք է պահանջվի»:
http://www.tert.am/am/news/2014/10/20/ani-restore/