Հայոց ցեղասպանության 100-ամյակին` նոր երգ ու տեսահոլովակ Արա Գևորգյանի մասնակցությամբ

«Ես ցանկացա, որ հայկական մեծ ցավի մասին խոսվի անգլերեն, խոսվի օտարի լեզվով, որպեսզի այն ճանաչելի դառնա աշխարհում»,-ասուլիսի ժամանակ ասաց երաժիշտ Արա Գևորգյանը:
Նա լրագրողներին տեղեկացրեց, որ ստեղծվել է նոր երգ՝ Ցեղասպանության 100-րդ տարելիցին ընդառաջ: Խոսքերի հեղինակներն են ամերիկացի կատարող Դանիել Դեքերը և Լևոն Բլբուլյանը: Երգը ձայնագրվել է ֆիլհարմոնիկ նվագախմբի և պետական ակադեմիական երգչախմբի հետ միասին՝ Էդուարդ Թոփչյանի և Հովհաննես Չեքիջյանի գլխավորությամբ:
«Քանի որ Սփյուռքի նախարարությունը կազմակերպել էր համահայկական երգչախմբերի փառատոն, և փառատոնի շրջանակներում Հայաստանում էին մոտ 15 երկրներից ժամանած երգչախմբեր,ինչպես նաև նշվում էր Հովհաննես Չեքիջյանի 85 ամյակը ես, օգտվելով առիթից, առաջարկեցի այս երգը, որը կոչվում է «Կանք ու կլինենք» (անգլերեն կոչվում է «Remember»)»,- ասաց երաժիշտը:
«Երգի հիման վրա նկարահանվում է տեսահոլովակ: Առաջին մասն արդեն նկարահանվել է Ծիծեռնակաբերդում. վերևից նայելիս 15 երգչախմբերի կանգնած դիրքը հիշեցնում է հենց 1915 թիվը»,- նշեց Արա Գևորգյանը:
Նա մասնավորապես ասաց, որ հետագայում նախատեսվում է, որ այդ երգչախմբերը, 15 տարբեր երկրներում, այդ երկրին հատուկ մի խորհրդանիշի մոտ կագնած, 15 տարբեր լեզուներով երգեն այդ երգը. «Կարծում եմ` կստացվի շատ գեղեցիկ, ազդեցիկ և հզոր տեսահոլովակ»:
Եվ վերջում Արա Գևորգյանն ասաց. «Երգի մեջ չկան լացակումած բառեր: Այն աղոթք է հիշեցնում՝ խոսք առ Աստված: Նրա մեջ կա պահանջ»:
Աղվան Ասոյան
AllTurkey.am