Ադանա քաղաքում քրդական թերթերի աշխատակից է սպանվել

Թուրքիայի Ադանա քաղաքում սպանվել է «Özgür Gundem» և «Azadiya Welat» քրդական թերթերը տարածող աշխատակիցը:
46-ամյա Քադիր Բաղդուն սովորականի պես կրպակներին թերթերը բաժանելիս է եղել, երբ երկու դիմակավոր անձ կարմիր մոտոցիկլետով անցել են նրա կողքով` հրազենային կրակոցներ հասցնելով Բաղդունին: Անհայտ անձինք փախուստի են դիմել: Հայտնի է, որ Բաղդուն «Azadiya Welat» թերթի աշխատակցի հավաստագիր է ունեցել, այս թերթերը բաժանել վերջին 17 տարիների ընթացքում: Ոստիկանությունը սպանության փաստի վերաբերյալ հետաքննություն է սկսել:
«Azadiya Welat» թերթից Բաղդունի գործընկեր Իբրահիմ Քարաքուշը այս սպանությունը համեմատել է 1990-ականներին տեղի ունեցած նմանօրինակ դաժան սպանության հետ, որն այդպես էլ չբացահայտվեց: Քարաքուշը ոստիկանությանը մեղադրել է անուշադրության մեջ, քանի որ նման դեպքեր հաճախ են պատահել: «Մեր ընկերները շատ անգամ են թիրախ դարձել նման կազմակերպված հարձակումների ժամանակ, որոնց մասնակցել են նաև ոստիկանության աշխատակիցներ»,-նշել է Քարաքուշը:
Թուրքերեն հրապարակվող «Özgür Gundem» թերթը և քրդերեն լույս տեսնող «Azadiya Welat» թերթը ունեն պրոքրդական ուղղվածություն: Վերջին օրերին Թուրքիայի քրդաբնակ շրջաններում նկատվող լարվածությունն ու բողոքի ցույցերը երկրում հակաքրդական տրամադրությունների պատճառ են դարձել:

http://ankakh.com/article/4712/adana-qaghaqum-qrdakan-thyerthyeri-ashkhatakits-e-spanvyel