Էրդողանի առաջին հայտարարությունը Քոբանիի դեպքերի վերաբերյալ

Թուրք-սիրիական սահմանից ոչ հեռու` Սիրիայի քրդաբնակ Քոբանի բնակավայրում տեղի ունեցող իրադարձությունների վերաբերյալ գրավոր հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը, տեղեկացնում է CNNTurk-ը:
Թուրքիայի նախագահի պաշտոնական կայքում արված հայտարարությունում մասնավորապես ասված է. «Սիրիայի Քոբանի (Այն ալ-Արաբ) բնակավայրում տեղի ունեցող իրադարձությունները շատ ցավալի են, սակայն ամենամեծ վիշտն այն է, որ Թուրքիայի տարբեր քաղաքներում բռնության հետևանքով բազմաթիվ մարդիկ են զոհվում: Ակնհայտ է` Քոբանիի դեպքերը որևէ կերպ կապված չեն Թուրքիայում այժմ տեղի ունեցող իրադարձությունների հետ: Վերջինիս կազմակերպիչներն իրենց գլխավոր մտադրություններն ու նպատակները թաքցնում են Քոբանիի դեպքերի քողի հետևում: Այս ամենը սադրանք է` ուղղված մեր ներքին և արտաքին քաղաքականության ձևավորմանը: Թուրքիան բազմիցս ապացուցել է, որ դեմ է կանգնած աշխարհում բոլոր տեսակի ահաբեկչական խմբավորումներին: Անչափ կարևոր է, որ մեր երկրի քաղաքական բոլոր կուսակցությունները լինեն շատ ուշադիր և պատասխանատու կերպով ցույց տան իրենց դիրքորոշումը տեղի ունեցող իրադարձությունների վերաբերյալ»:
Տեղեկացնենք, որ վերջին օրերին ցույցի դուրս եկած քրդերը մեղադրում են թուրքական պետությանն «Իսլամական պետություն» իսլամիստական կազմակերպությանն աջակցելու և Քոբանիի քրդերին օգնություն չտրամադրելու համար: Արյունալի բախումները քրդերի և թուրք իրավապահների միջև բերել են մեծաթիվ զոհերի ցուցարարների շրջանում:
Վերջին շրջանում Սիրիայի քրդաբնակ Քոբանի շրջանում կատաղի մարտեր են քրդական ուժերի (YPG) և իսլամիստների միջև, ինչի հետևանքով տարածքի բնակիչների զգալի մասը փախստական է դարձել: Իսլամիստները կարողացել են վերջին օրերին որոշակի հաջողության հասնել քրդական կողմի նկատմամբ: Մարտերը դեռ շարունակվում են:
Նշենք, որ Սիրիայի ներքին հակամարտության Բաշար Ասադի և մի շարք այլ ուժերի դեմ ռազմական գործողությունների ժամանակ հաջողություններ գրանցած «Իսլամական պետություն» (նախկին անվանումը` «Իրաքի և Ասորիքի իսլամական պետություն/խալիֆայություն») խմբավորման զինյալները 2014-ի հունիսի կեսերին կարճ ժամկետում կարողացան լուրջ ռազմական հաջողություններ գրանցել նաև իրաքյան զինուժի դեմ ու հսկողություն սահմանել Իրաքի հյուսիս-արևմտյան շրջանների, այդ թվում` և երկրի երկրորդ քաղաքի` Մոսուլի նկատմամբ։ Իսլամիստների թիրախում ոչ միայն իրաքյան զինուժն է, այլ նաև տեղաբնակ քրդերն ու եզդիները: Այժմ «Իսլամական պետություն» խմբավորման դեմ ԱՄՆ գլխավորությամբ միջազգային կոալիցիա է ձևավորվել, որը դեռևս միայն օդային հարվածներ է հասցնում իսլամիստներին:
Թուրքիան սկզբնական շրջանում խուսափում էր միանալ ԻՊ-ի դեմ գործողություններին` պատճառ բերելով հունիսից ԻՊ-ի կողմից գերեվարված Մոսուլի թուրքական հյուպատոսարանի աշխատակիցներին սպառնացող վտանգը: Այնուամենայնիվ, սեպտեմբերին գերիները բավական կասկածելի իրավիճակում անվնաս տեղափոխվեցին Թուրքիա, ինչից հետո պաշտոնական Անկարան փոխեց հռետորաբանությունը` ավելի ագրեսիվ լինելով ԻՊ-ի դեմ, սակայն դեռևս խուսափում է ուղիղ ռազմական գործողություններից: Հոկտեմբերի սկզբին Թուրքիայի ազգային մեծ ժողովն օրենք ընդունեց, որով թույլատրում էր Թուրքիայի զինված ուժերին ռազմական գործողություններ իրականացնել Սիրիայի և Իրաքի տարածքում, ինչպես նաև արտասահմանյան զորքերին թույլատրել օգտագործել իր բազաներն ու տարածք` իսլամիստներին հարվածելու համար: Թուրքիայի քրդերն էլ պահանջում են, որպեսզի այս օրենքի հիման վրա թուրքական կողմը զորքերը մտցնի քրդաբնակ Քոբանի (Այն ալ-Արաբ)` օգնելու տեղի քրդերին ԻՊ-ի դեմ պայքարում: Թուրքիայի իշխանությունները հրաժարվում են որևէ կերպ գործողության գնալ ԻՊ-ի դեմ, որն արդեն հսկում է թուրք-սիրիական սահմանի զգալի մի հատվածը:
Արթուր Դոլբակյան
AllTurkey.am