Հայկական դպրոցներին գումար տրամադրելը Թուրքիայի բարի կամքի դրսևորում չէ. Ռուբեն Մելքոնյան

Թուրքագետ Ռուբեն Մելքոնյանը, Tert.am-ի հետ զրույցում անդրադառնալով Թուրքիայի կառավարության կողմից հայկական դպրոցներին հատկացված մեծ գումարին, ասաց, թե այստեղ կոնկրետ հայերի նկատմամբ ընդգծված բարյացակամ քաղաքականություն չկա:
Նշենք, որ Թուրքիայի կառավարությունը երկրում ապրող ազգային փոքրամասնությունների դպրոցներին 9 մլն 500 հազար թուրքական լիրա է հատկացրել, այդ օժանդակության 7 մլն 843 հազար թուրքական լիրան հատկացվել է հայկական դպրոցներին:
«Այստեղ ո´չ թե ընդգծված դրական վերաբերմունք է հայերի նկատմամբ, այլ ուղղակի հայկական համայնքն իր թվային ներկայության շնորհիվ ստացել է այդ գումարի մեծ մասը»,-ասաց Ռուբեն Մելքոնյանը:
Նրա խոսքով՝ նախևառաջ պետք է նկատել, որ Եվրամիությանն անդամակցության գործընթացում Թուրքիային պարտադրվել են որոշակի դրույթներ, և այդ դրույթներից մեկն էլ հենց փոքրամասնությունների հետ է կապված, մասնավորապես՝ փոքրամասնությունների կրթական իրավունքների, դպրոցների, կրոնական հաստատությունների հարցը:
«Այս քայլը ո´չ թե Թուրքիայի բարի կամքի դրսևորումն է, այլ մի կողմից՝ իր ստանձնած պարտավորությունների մասը, երկրորդն էլ՝ Եվրոպայի կամ քաղաքակիրթ հանրության աչքին ավելի հանդուրժող երևալու ձգտումն է»,-նշեց Ռուբեն Մելքոնյանը՝ ավելացնելով նաև, որ սա առաջին անգամը չէ, որ արվում է, արդեն նախադեպեր կան՝ ֆինանսավորում է հատկացվել դասագրքերի տպագրության և տարատեսակ այլ խնդիրների համար:
Թուրքագետը կարծում է, որ Ցեղասպանության 100-ամյա տարելիցի համատեքստում Թուրքիան իր այս քայլերն ավելի ներգովազդային արշավի շրջանակներում է ներկայացնելու և անպայման փորձ է անելու դրանով ցույց տալ, որ բավական հանդուրժող է իր երկրի տարածքում ապրող փոքրամասնությունների, մասնավորապես՝ հայերի հետ կապված:
Ինչ վերաբերում է գումարի բաշխվածությանը, ապա Ռուբեն Մելքոնյանը կարծում է, որ այստեղ էլ որևէ զարմանալու բան չկա, քանի որ պետության կողմից ընդունված փոքրամասնությունները երեքն են՝ հայերը, հույները, հրեաները:
«Հայկական համայնքը կազմում է մոտ 60 000 մարդ, հրեական համայնքը՝ մոտ 15 000 մարդ, հունական համայնքը՝ 1 500 մարդ: Բնական է, որ ըստ թվերի համադրության՝ պետք է նման կերպ լինի գումարի բաժանումը: Հայկական դպրոցների թիվը մոտ 16 է, իսկ հունական նորմալ գործող դպրոցների թիվը՝ 3»,-եզրափակեց թուրքագետը:
http://www.tert.am/am/news/2014/10/08/melqonyan4/