Ստամբուլում տեղի է ունեցել «Նկարիչների փոխանակման» հայ-թուրքական նախագծի երկրորդ փուլը

Եվրամիության կողմից ֆինանսավորվող Հայաստանի և Թուրքիայի միջև հարաբերությունների բարելավմանն ուղղված ծրագրի շրջանակներում հայ և թուրք 8 երիտասարդ արվեստագետներից բաղկացած խումբը մասնակցել է «Նկարիչների փոխանակման» հայ-թուրքական նախագծին: Թուրքիայից «Anadolu Kültür» և Հայաստանից «Հանրային լրագրության ակումբ» կազմակերպությունների նախաձեռնությամբ երիտասարդ նկարիչները ծրարի առաջին փուլում այցելել են Երևան, ապա Ստամբուլ:
«Ակօս»-ի հաղորդմամբ` երիտասարդները Ստամբուլում մասնակցել են նկարիչներ Գագիկ Չարչյանի և Սերդար Յըլմազի կողմից մատուցված վարպետության դասընթացների, շրջել են Ստամբուլի թանգարաններով, հին թաղամասերով, պատմական վայրերով, ծանոթացել քաղաքի ճարտարապետությանը, որի մեջ հսկայական ներդրում են ունեցել նաև հայ ճարտարապետները, ինչպես նաև այցելել են Հեյբելի կղզի: Միմար Սինանի անվան գեղարվեստի ֆակուլտետի դասախոս Գյուլչին Աքսոյը և արվեստի պատմության մասնագետ Ֆըրաթ Արաբօղլուն վարպետության դասեր են տվել ծրագրի մասնակցիներին:
Ծրագրի թուրք մասնակցիներից Ջիհան Էլիբոլը պատմել է Երևանից ստացած իր տպավորությունների մասին: «Հայաստանը ինձ շատ էր հետաքրքրում: Ցավոք, միշտ չէ, որ կարող ենք այս երկիր այցելել: Երևանը շատ հետաքրքիր էր: Մեր սպասածի պես արևելյան տիպի քաղաք չէր, շատ համակարգված: Տեսանք նաև խորհրդային ազդեցությունը»: Մեկ այլ մասնակից Էրդեմ Թոփբաղը նշում է. «Ես արտասահմանի համար փոքր-ինչ փակ մարդ եմ: Հայաստան գնալիս մեծ սպասումներ չունեի, սակայն տեսա, որ տարբեր է, և կարող եմ ասել, որ մտահորիզոնս բացվեց: Միայն այս ծրագրի ավարտից հետո իմացա, որ հայ-թուրքական սահմանը փակ է: Տեսա, որ մեր միջև շատ ընդհանուր բաներ կան: Սահմանի փակ լինելը մի քիչ տարօրինակ է»:

http://ankakh.com/article/4025/stambulum-tyeghi-e-unyetsyel-«nkarichnyeri-pvokhanakman»-hay-thurqakan-nakhagtsi-yerkrvord-pule