Թուրքիայում ինքնակազմակերպման քայլեր անող հայերին թուրքագետը զգոնության կոչ է անում

Արդեն քանի տարի է` Թուրքիայի տարածքի տարբեր վայրերում հայերը, այդ թվում` իսլամացած հայերը, փորձում են ինքնակազմակերպման որոշակի քայլեր անել, և արդեն մի քանի այդպիսի հասարակական կազմակերպություններ կան։ Այս մասին Tert.am-ին հայտնեց թուրքագետ Ռուբեն Մելքոնյանը։
«Ես, ընդհանուր առմամբ դրական եմ գնահատում այդ երևույթը, սակայն մյուս կողմից զգոնության կոչ եմ անում, քանի որ նմանատիպ միություններում թուրքական իշխանությունները փորձում են ներդնել ինչ-որ մարդկանց և որոշակի ուղղորդումներ անել։ Տարբեր հասարակական կազմակերպությունների որոշակի քայլեր, եթե ուշադիր դիտարկեք, ապա կտեսնեք, որ շատ հաճախ դրանք խորքային առումով ձեռնտու են թուրքական իշխանություններին, և դրանով նաև թուրքական իշխանությունները լրացուցիչ մի հնարավորություն են ունենում ավելի մոտիկից ծանոթանալու հայկական տարբեր խնդիրներին»,-ասաց նա։
Թուրքագետը օրինակ բերեց, որ նման ՀԿ-ները մասնակցում են Հայաստանում տարբեր միջոցառումներին, և չի բացառվում, որ նրանց միջոցով նաև այստեղ տեղի ունեցող տարբեր իրադարձություններ շատ ավելի մանրակրկիտ հայտնի դառնան թուրքական իշխանություններին։ «Միության կազմակերպիչների և անդամների մեջ անպայման լինում են նվիրյալներ, որոնք փորձում են տեղի հայերին կազմակերպել և, իհարկե, լինում են պատեհապաշտներ, ովքեր այլևայլ նպատակներով են անդամակցում այդ միություններին։ Ես պարզապես կոչ եմ անում ավելի սառը և ավելի զգոն մոտենալ հարցին՝ դա դիտարկելով որպես Թուրքիայի ներսում տեղի ունեցող որոշակի երևույթ»,-ասաց նա։
Ռուբեն Մելքոնյանը նշեց, որ ՀԿ-ները զբաղվում են եկեղեցիների, սրբավայրերի վերադարձման հարցով և երբեմն որոշակի արդյունքների հասնում են, սակայն դրանք առավելապես թուրքական իշխանությունների իմիտացիոն կամ քարոզչական քայլերը լեգիտիմացնելու համար են շատ հաճախ ծառայում։
«Ինչ վերաբերում է եկեղեցիների վերադարձին, ապա ես մտավախություն ունեմ, որ 2015 թվականին ընդառաջ շատանալու են նման «վերադարձի» օրինակներ, երբ հայկական տարբեր տարիներին խլված գույքերից փոքր մաս վերադարձվեն Ստամբուլի հայոց պատրիարքությանը, և դրանց շուրջ կազմակերպվի լուրջ քարոզչություն, որը միտված է լինելու ամբողջ աշխարհին ցույց տալու Թուրքիայի իբրև թե քաղաքակիրթ և հանդուրժող նկարագիրը»,-ասաց մեր զրուցակիցը։
http://www.tert.am/am/news/2014/09/28/ruben-melqonian2/