Կանադայի Լիբերալ կուսակցությունը դատապարտել է Դեր Զորի Սրբոց նահատակաց հայկական եկեղեցու պայթեցումը

Կանադայի Լիբերալ կուսակցությունը դատապարտել է «Իսլամական պետություն» ծայրահեղական խմբավորման ահաբեկիչների կողմից Սիրիայի Դեյր էզ Զոր քաղաքի (կամ Դեր Զոր) Սրբոց նահատակաց հայկական եկեղեցու պայթեցումը։
Եկեղեցին, որը գտնվում է Սիրիայի արևելքում, կառուցվել է 1991-ին՝ Հայոց Մեծ եղեռնի զոհերի հիշատակին, և այստեղ են ամփոփված բազմաթիվ զոհերի մասունքներ։
««Իսլամական պետություն» խմբավորման կողմից այս եկեղեցի-հուշահամալիրի պայթեցումը չափազանց ցավալի է։ Այս հանցագործությունից հետո ԻՊ-ը կործանել է շատ այլ եկեղեցիներ, մզկիթներ, սրբավայրեր և մշակութային վայրեր։ Այս սրբավայրերը պահպանվել են դարերով տարբեր դավանանք ունեցող մարդկանց կողմից։ «Իսլամական պետություն»-ը շարունակում է ցույց տալ, որ չի հարգում միջազգային նորմերը և մշակութային ու կրոնական տարբերությունները, բացի իրենց սահմանափակ, խեղաթյուրված գաղափարախոսությունից»,- նշել է կուսակցության միջազգային հարցերով քննադատ Մարկ Գարնոն։
Լիբերալ կուսակցության բազմամշակութային հարցերով քննադատ Ջոն ՄքՔալումն էլ նշել է. «Այս կորուստը կզգան ոչ միայն հայերը, այլև ամբողջ աշխարհը։ Ամոթալի է, որ «Իսլամական պետություն»-ը կարող է պայթեցնել մի վայր, որը նվիրված է եղել հիշատակին և համերաշխությանը»։
Կանադայի Լիբերալ կուսակցությունից խորհրդարանի անդամ Առնոլդ Չանն ասել է. «Լիբերալ կուսակցությունն իր համերաշխությունն է հայտնում հայ ժողովրդին և դատապարոտում այս սարսափելի հարձակումն իր սրբավայրի նկատմամբ։ Աշխարհը ցնցված է«Իսլամական պետության»` շարունակվող վայրագություններից, և սա վերջինն է այս խմբավորման սարսափելի գործողությունների երկար ցուցակում»։
http://www.tert.am/am/news/2014/09/27/canada-church/