Թուրք մտավորականները կոչ են անում ներողություն խնդրել հայ աշակերտներից

Մի խումբ թուրք մտավորականներ, գրողներ, ակադեմիկոսներ և արվեստագետներ հանդես են եկել թուրքական պատմության դասագրքերը քննադատող հայտարարությամբ:
Այս տարի ևս թուրքական դպրոցների պատմության դասագրքերում կրոնական և ազգային փոքրամասնությունների, մասնավորապես հայերի դեմ ատելություն և թշնամանք պարունակող արտահայտություններ են տեղ գտել:
Հայտարարության տակ ստորագրած 5 տասնյակից ավելի մտավորականները նմանատիպ արտահայտություն պարունակող գրքերով ուսուցումը «մեծ ամոթ» են որակել: Այս մասին տեղեկացնում է թուրքական «T24» լրատվական կայքը:
Մտավորականները կոչ են արել պատմության դասագրքերը հանել ուսումնական ծրագրից և ներողություն խնդրել հայ աշակերտներից:
Պատմաբան Թաներ Աքչամը, խոսելով մտավորականների հայտարարության մասին, նշել է. «Այս կոչը մեզ հիշեցնում է, թե որքան մեծ կարևորություն ունի այնպիսի դասագրքերի պատրաստումը, որոնք էթնիկ, կրոնական խմբերի միջև ոչ թե ատելության, այլ խաղաղության, եղբայրության և համակեցության զգացումներ կխրախուսեն և կներկայացնեն ոչ թե սուտը, այլ ճշմարտությունը»:
Հայտարարության տակ ստորագրել են՝
Ահմեթ Հաքանը, Ալի Նեսինը, Ալի Բայամօղլուն, Բասքըն Օրանը, Ֆաթիհ Աքընը, Հասան Ջեմալը, Մուրաթ Բելգեն, Օրհան Փամուքը, Թաներ Աքչամը և այլք:

http://ermenihaber.am/?lang_id=2&news_=4&cur_news=1896