Հարութ Սասունյան. Հայաստանում Էրդողանը կարող է ցավակցություն հայտնել

Եթե Թուրքիայի նախագահ Ռեջեփ Թայիփ Էրդողանը 2015 թվականի ապրիլի 24-ին այցելի Հայաստան, նա ցավակցություն կհայտնի Առաջին համաշխարհային պատերազմի տարիներին հայ եւ թուրք զոհերի առիթով:

Այս մասին NEWS.am-ի թղթակցի հետ զրույցում հայտարարեց ամերիկահայ հրապարակախոս, ամերիկյան «Կալիֆորնիա Կուրիեր» թերթի խմբագիր Հարութ Սասունյանը:
Նրա խոսքով, հնարավոր է՝ շատերը կարծում են, որ Էրդողանը կհրաժարվի 2015թ. ապրիլի 24-ին Հայաստան այցելել, եւ այդպիսով կվնասի իր վարկանիշին ամբողջ աշխարհում: «Ոմանք էլ կարծում են, որ նա կհամաձայնի Հայաստան ժամանել եւ այդ այցով կճանաչի Ցեղասպանությունը: Բայց ես կարծում եմ, որ ավելի հավանական է երրորդ տարբերակը. եթե նախագահ Էրդողանը Հայաստան գա, նա ցավակցություն կհայտնի Առաջին համաշխարհային պատերազմի տարիներին հայ եւ թուրք զոհերի առիթով»,- նշեց Սասունյանը:
Նա նաեւ հավելեց, որ դա ոչ մի կերպ չի նպաստի Հայոց ցեղասպանության ճանաչմանը, ընդհակառակը, միայն կվնասի գործընթացին: «Աշխարհի բազմաթիվ երկրների ղեկավարներ այդ ժամանակ կմտածեն, թե «որքան ազնիվ հայտարարություն արեց Էրդողանը», եւ այդ դեպքում մենք ոչինչ չենք շահի: Դա շատ վտանգավոր քայլ է, որը կարող է վնասել մեզ»,- ընդգծեց Հարութ Սասունյանը:
Հիշեցնենք, որ օգոստոսի 28-ին Հայաստանի ԱԳ նախարար Էդվարդ Նալբանդյանը ներկա էր Թուրքիայի նախագահ Էրդողանի երդմնակալության արարողությանը, որի ընթացքում նա վերջինին փոխանցեց Հայաստանի նախագահ Սերժ Սարգսյանի՝ 2015 թվականի ապրիլի 24-ին մեր երկիր այցելելու հրավերը:
http://news.am/arm/news/230638.html