Հայաստանի մէջ Միացեալ Նահանգներու դեսպանատունը խստիւ կը դատապարտէ Տէր Զօրի Սրբոց Նահատակաց եկեղեցւոյ աւերումը

Հայաստանի մէջ Միացեալ Նահանգներու դեսպանատունը հաղորդագրութիւն մը հրապարակելով յայտարարեց, որ դեսպանատունը կը միանայ Հայաստանի կառավարութեան ու ժողովուրդին` խստիւ դատապարտելով Սուրիոյ Տէր Զօր քաղաքին մէջ Սրբոց Նահատակաց հայկական եկեղեցւոյ աւերումը:
Յայտարարութեան մէջ կ՛ըսուի. «Այս անմիտ աւերածութիւնը դարձեալ կը փաստէ ՏԱՀԵՇ ահաբեկչական կազմակերպութեան բացարձակ քամահրանքը Միջին Արեւելքի հարուստ կրօնական եւ մշակութային ժառանգութեան նկատմամբ:
«Ինչպէս նշած է արտաքին գործոց նախարար Քերրին, ՏԱՀԵՇ-ը համակարգուած կերպով կատարած է մարդու իրաւունքներու եւ միջազգային իրաւունքի խախտումներ եւ կը հանդիսանայ համաշխարհային ահաբեկչական սպառնալիք: Այս սպառնալիքին դէմ դնելու համար Միացեալ Նահանգներ կոչ կ՛ուղղեն միջազգային ընտանիքին ամրապնդելու միասնական ջանքերը` կազմալուծելու եւ վերացնելու ՏԱՀԵՇ-ը»:
Նաեւ` Քոնկրեսի Անդամներ
Միացեալ Նահանգներու Քոնկրեսի անդամները սկսած են իրենց դժգոհութիւնը յայտնել եւ դատապարտել Տէր Զօրի Հայոց ցեղասպանութեան նուիրուած թանգարան-եկեղեցւոյ ՏԱՀԵՇ-ի կողմէ աւերումը:
«Ասպարէզ» կը գրէ, որ Քոնկրեսի ներկայացուցիչներ Ֆրենք Փալոն, Ճիմ Քոսթա եւ Էտըմ Շիֆ յայտարարութիւններ հրապարակած են` արտայայտելով իրենց վրդովմունքը ՏԱՀԵՇ-ի բարբարոսական գործողութիւններուն նկատմամբ:
Փալոն յայտարարած է. «Ես խորապէս հիասթափուած եւ բարկացած եմ Տէր Զօրի մէջ Հայոց ցեղասպանութեան յուշարձան-եկեղեցւոյ աւերումով: Այս եկեղեցին կանգուն էր` ոգեկոչելու եւ պատուելու հարիւր հազարաւոր հայեր, որոնք մահացած էին Տէր Զօրի ճամբուն վրայ` օսմանցի թուրքերու կազմակերպած 20-րդ դարու առաջին ցեղասպանութեան ժամանակ: Այդ ահաւոր պատմական իրողութիւնը յիշատակող եկեղեցւոյ աւերումը պէտք է արժանանայ միջազգային արձագանգի»:
«Ես խստօրէն կը դատապարտեմ Սուրիոյ մէջ Իսլամական պետութեան կողմէ Հայոց ցեղասպանութեան յուշակոթողի աւերումը», գրած է Քոսթա թուիթըրեան իր էջին վրայ:
Իր կարգին Շիֆ իր յայտարարութեան մէջ ըսած է. «ՏԱՀԵՇ-ի գործադրած աւերումը Տէր Զօրի Հայոց ցեղասպանութեան յուշակոթողին մէջ յաւելեալ օրինակ է Իրաքի եւ Սուրիոյ մէջ տիրող նողկալի բարբարոսութեան, որ կ՛ահաբեկէ միլիոնաւոր մարդիկ: Այն հանգամանքը, որ յուշակոթողը նուիրուած էր ցեղասպանութեան զոհերուն, ցաւալի ու սարսափեցնող է, երբ պատկերացնենք, թէ ի՛նչ կրնան ընել ՏԱՀԵՇ-ի զինեալները սուրիացի քրիստոնեաներուն: Մենք պէտք է աջակցինք միջազգային դաշինքին, որ օդային հարուածներու միջոցով կը փորձէ օգնել Սուրիոյ եւ Իրաքի բնակչութեան` ազատելու այս քաղցկեղէն»:

http://www.aztagdaily.com/archives/205549