Մշեցի հայերն ունեցան իրենց միությունը*

Ույգար Գյուլթեքին
Սասունցիներից, սվասցիներից, մալաթիացիներից և դերսիմցիներից հետո մշեցի հայերը ևս մի միություն հիմնեցին: Տարոնի մշեցի հայերի համերաշխության, սոցիալական և զբոսաշրջության միությունը, յոթ հոգանոց ղեկավար խորհրդի կազմավորումից հետո, հանդես եկավ պաշտոնական դիմումով: Տարոնի մշեցի հայերի համերաշխության, սոցիալական և զբոսաշրջության միությունը, որպես առաջնահերթ գործ, աշխատանքներ մեկնարկեց` Մուշում հայերին պատկանող մշակութային կառույցների պահպանման ուղղությամբ:

Մինչ Մուշում քաղաքային ձևափոխության անվան տակ շարունակվում է հայկական մշակութային ժառանգության ոչնչացումը, մյուս կողմից էլ պայքար է մղվում` այդ մշակույթը պահպանելու համար: Մշեցի հայերը միավորվեցին այն ժամանակ, երբ կառավարությունն ու քաղաքապետարանը նախապատվություն տվեցին Բնակարանների ընդհանուր ղեկավարության (TOKİ) բարձր բլոկներին` Մուշի` տարիներ շարունակ կանգուն մնալ հաջողած հինավուրց թաղամասի փոխարեն:
Սասունցիներից, սվասցիներից, մալաթիացիներից և դերսիմցիներից հետո մշեցի հայերը ևս մի միություն հիմնեցին: Տարոնի մշեցի հայերի համերաշխության, սոցիալական և զբոսաշրջության միությունը, յոթ հոգանոց ղեկավար խորհրդի կազմավորումից հետո, հանդես եկավ պաշտոնական դիմումով: Մուշում անդամներ ընդունել սկսած միությունն առաջիկա շաբաթվա մեջ նախագահ կընտրի:

«Մուշը նաև մե՛ր հայրենիքն է»
Մուշում բնակվող հայ Արմեն Գալուստյանը, ով նաև ընդգրկվել է միության ղեկավար խորհրդի կազմում, «Ակօս» շաբաթաթերթին տեղեկություններ ներկայացրեց` միության հիմնման, իրենց ստացած արձագանքների և անելիքների վերաբերյալ:
Գալուստյանը նշելով, որ Մուշի պես` հայ բնակչության թիվը նվազած մի վայրում միություն ստեղծելը դժվար է, սակայն հիմնումից հետո շատ դրական արձագանքներ են ստացվել, ասաց. «Մուշում թուրքերի, քրդերի և արաբների նման` կան նաև հայեր: Մուշը նաև մե՛ր հայրենիքն է: Դա այլևս պետք է ընդունվի»:
Միությունը, որպես առաջնահերթ գործ, աշխատանքներ մեկնարկեց` Մուշում հայերին պատկանող մշակութային կառույցների պահպանման ուղղությամբ: Կազմակերպությունը պահանջում է, որ իրեն փոխանցվի ոչնչացման եզրին գտնվող եկեղեցին, որպեսզի հնարավոր լինի այն վերականգնել: Այդ նպատակով սկսվել են քաղաքապետարանի հետ բանակցությունները: Նաև հայկական գերեզմանատունը պահպանման տակ վերցնել ձգտող միությունն ապահովել է, որ գերեզմանատունը գրանցվի:
Գալուստյանը հայտնելով, որ Քալե թաղամասի ավերումից հետո կանգուն մնալ կարողացած տների կապակցությամբ հանդիպումներ են եղել Հուշարձանների խորհրդի հետ, և որոշ տներ գրանցվել են, միության նպատակների վերաբերյալ նշեց. «Ներկա պահին միության համար մի տեղ ենք վարձակալել: Ցանկանում ենք մեզ համար մի վայր գնել և մի շենք կառուցել, որը կկարողանանք օգտագործել որպես միության կենտրոն և հյուրատուն: Եթե կարողանանք դա անել, հայերենի դասընթաց կսկենք: Առաջիկայում նաև ծրագրում ենք մի մանկամսուր բացել»:
Մշեցի հայերը դժգոհ են Ստամբուլում գտնվող վաքըֆների ղեկավարներից: Գալուստյանն այդ դժգոհության մասին ասաց. «Ստամբուլից ոչ մի ակնկալիք չունենք: Նրանք հասարակության աղբյուրներն այնպես են օգտագործում, կարծես դրանք իրենց սեփականությունը լինեն: Անգամ սեփական վաքըֆներին օգուտ չեն տալիս, ուր մնաց, թե մեզ տան»:
Գալուստյանը նշելով, թե միության հիմնումից հետո մշեցի հայերն սկսել են իրենց զանգահարել` հայրենի երկիր վերադառնալու համար, նաև հայտնեց, որ իրենք, որպես միություն, ուզում են պայմաններ ստեղծել` նրանց վերադարձն ապահովելու համար:

uygargultekin@agos.com.tr
http://www.agos.com.tr/haber.php?seo=mus-ermenileri-derneklerine-kavustu&haberid=8200
Թարգմանեց Մելինե Անումյանը
Թարգմանությունը կատարվել է ՀԵՀ-ի որպես ՀՀ նախագահի կողմից գործընկեր կազմակերության հայտարարած` «Հայության խնդիրներն ու իրավունքները Թուրքիայի Հանրապետությունում» անվանակարգով դրամաշնորհով աշխատանքի շրջանակներում:
Akunq.net