Թուրքիայում մեկ միլիոն աթեիստ կա

Հրապարակվել է 2013 թ. ԱՄՆ-ի պետդեպարտամենտի` աշխարհում կրոնի ազատության մասին զեկույցի թուրքերեն թարգմանությունը: Զեկույցում նշվել է, որ Թուրքիայում բնակվող «եզդիների» թիվը 5 հազար է, իսկ աթեիստներինը` 1 միլիոն 540 հազար:
ԱՄՆ-ի պետդեպարտամենտի կողմից հուլիս ամսին հրապարակված 19 էջանոց զեկույցի` երեկ ներկայացված թուրքերեն տարբերակում տեղ են գտել ուշագրավ մանրամասներ և փաստեր: Զեկույցում Թուրքիայի վերաբերյալ ընդգծվել է, թե «թեև կրոնական ազատությունները սահմանափակված են որոշ սահմանադրական դրույթների, օրենքների և տարվող քաղաքականության միջոցով, սակայն, այնուամենայնիվ, սահմանադրությունը և մյուս օրենքներն ու քաղաքականությունները, ընդհանուր առմամբ, պահպանում են կրոնական ազատությունները»:
Զեկույցում նշվել է, որ «Քրիստոնյաները, բահայականները և ալևիները` ներառյալ, ոչ սուննի մուսուլմաններն ու մյուս կրոնական փոքրամասնությունները ենթարկվել են հասարակական քամահրանքի և սպառնալիքների: Հրեա առաջնորդները հայտնել են մամուլում և հանրության որոշ շրջանակներում անընդհատ բարձրաձայնվող հակասեմական տրամադրությունների նկատմամբ հրեական համայնքի հետզհետե աճող անհանգստության մասին»:
60 հազար հայ, 21 հազար հրեա
Զեկույցում, որում արձանագրվել է, որ Թուրքիայում 5 հազար տեղաբնակ եզդի կա, նաև նշվել է.
«Իսկ մյուս կրոնական խմբերը, որոնց մեծ մասը բնակվում է Ստամբուլում և այլ մեծ քաղաքներում, բնակչության մեկ տոկոսն անգամ չեն կազմում: Թեև հաստատ թվեր չկան, սակայն այդ խմբերը ենթադրաբար հետևյալն են` 500 հազար շիա ջաֆերի մահմեդական, 90 հազար Հայ առաքելական եկեղեցու հետևորդ (սույն խմբի անդամներից 60 հազարը Թուրքիայի քաղաքացի է, իսկ մնացած 30 հազարը` ենթադրաբար ընդգրկում է Հայաստանից եկած փախստականներին, որոնք գրանցում չունեն), 25 հազար կաթոլիկ քրիստոնյա (սրանց մեծ մասը կազմում եմ Աֆրիկայից ու Ֆիլիպիններից եկած գաղթականները), 21 հազար հրեա, 20 հազար ասորական ուղղափառ քրիստոնյա, 15 հազար ռուս ուղղափառ քրիստոնյա (որոնց մեծ մասը Ռուսաստանից եկած ու բնակության թույլտվություն ստացած գաղթականներ են), 10 հազար բահայականներ, 5 հազար եզդիներ, 5 հազար Եհովայի վկաներ, 7 հազար բողոքականներ, 3 հազար իրաքցի քաղդեացի քրիստոնյաներ, 2.500 էլ հույն ուղղափառ քրիստոնյաներ:
Բացի այդ, թեև կոնկրետ թիվը հայտնի չէ, սակայն այդ տոկոսի մեջ են մտնում նաև բուլղար ուղղափառները, նեստորականները, վրացի ուղղափառները, ասորի կաթոլիկները, հայ կաթոլիկներն ու մարոնիտները:
Երկրում անհայտ թվով աթեիստներ էլ կան. միջազգային և մասնավոր թուրքական ընկերությունների հարցումները տարբեր թվեր են ներկայացնում, սակայն վերջերս հրապարակված հարցման արդյունքի համաձայն` բնակչության 2 տոկոսը բաղկացած է աթեիստներից»:
ԱՄՆ-ի` 2013 թվականն ընդգրկող տարեկան զեկույցը ներկայացվել էր Ամերիկայի արտգործնախարարությունում` պետքարտուղար Ջոն Քերրիի կողմից:
Զեկույցում, որում նշվել է, թե սուննիները պաշտպանված են, շեշտվել է, որ «քաղաքական առաջնորդների շրջանակներում և պրոկառավարական զանգվածային լրատվամիջոցներում ավելացել են հակասեմական մոտեցումները»:

(«Բիրգյուն» պարբերական)
http://www.kent34.com.tr/turkiyede-1-milyon-ateist-var/12433/
Թարգմանեց Մելինե Անումյանը
Akunq.net