Թուրքիայի խորհրդարանի նախագահը խոսել է Հայոց ցեղասպանության մասին

Թուրքիայի Ազգային մեծ ժողովի նախագահ Ջեմիլ Չիչեքը սեպտեմբերի 17-ին խոսել է Թուրքիայի առջև ծառացած մի շարք մարտահրավերների մասին, տեղեկացնում է թուրքական Հաբերլեր լրատվական գործակալությունը:
Չիչեքը անդրադարձ է կատարել Սիրիայի և Իրաքի հիմնախնդիրներին, ինչպես նաև Հայկական հարցին՝ նշելով, որ այս ոլորտներում Թուրքիայից որոշակի ծրագրեր և քայլեր են ակնկալվում:
Չիչեքը, անդրադառնալով Հայկական հարցին, նշել է, որ Հայոց ցեղասպանության 100-րդ տարելիցին մոտենալուն զուգընթաց հայկական սփյուռքը քայլեր է կատարում Թուրքիայի դեմ:
Թուրքիայի Ազգային մեծ ժողովի նախագահի խոսքերով «տարբեր երկրների խորհրդարանականները չպետք է գործիք դառնան Հայոց ցեղասպանության հարցում, և այդ հարցի քննարկումը պետք է վստահել պատմաբաններին»:
Շարունակելով իր միտքը՝ Չիչեքը ասել է, որ Թուրքիան մշտապես բաց է այդ հարցում, իրենք պատրաստ են տրամադրել իրենց ձեռքի տակ եղած բոլոր փաստերը, բոլոր պատմական աղբյուրները ցանկացած երկրի քաղաքացի հանդիսացող գիտնականի, որը կորոշի ուսումնասիրություններ կատարել այս թեմայով:
Վերջում Չիչեքը կոչ է արել «քաղաքական գործիչներին չզբաղվել այդ թեմայով, քանի որ, ըստ Չիչեքի, «անցյալին մոտենալը, այդ կնճիռներին լուծում տալը քաղաքական գործիչների պարտականությունը չէ»: Նրա խոսքերով պատգամավորները և քաղաքական գործիչները պետք է զբաղված լինեն ներկայի և ապագայի կառուցմամբ, ոչ թե անցյալին վերաբերվող հարցերի քննարկմամբ:
Հայկ Դարբինյան
AllTurkey.am