Կամ կինը Պետրոսի, կամ կեսը Կիպրոսի. 1955-ին հայերի ջարդերը Մարդինում

Թուրքիայում 1955-ի սեպտեմբերի 6-ին եւ 7-ին կազմակերպված հայերի, հույների, ասորիների եւ հրեաների ջարդերը որքան էլ որ տարօրինակ է շարունակվել են նաեւ հանդուրժողական քաղաքի համբավ ունեցող Մարդինում:
Թուրքական Demokrathaber կայքի փոխանցմամբ՝ Թուրքիայում 1955-ի սեպտեմբերի 6-ի եւ 7-ի կոտորածները, բացի Ստամբուլից եւ մյուս խոշոր քաղաքներից, տեղի են ունեցել նաեւ փոքր քաղաքներում, ինչպիսին է Մարդինը, որտեղ թուրքերի, քրդերի հետ համատեղ շարունակում էին ապրել հայեր ու ասորիներ:
Կայքը մեջբերում է Մարդինում այդ օրերին ականատեսի վկայությունները, ըստ որի՝ ասորիների տները թալանելու ընթացքում մուսուլմանները հնչեցնում էին՝ «Կամ կինը Բուտրոսի, կամ կեսը Կիպրոսի», իսկ հայերին թալանելու ժամանակ՝ «Կամ կինը Պետրոսի, կամ կեսը Կիպրոսի» կարգախոսը:
«Այդ իրադարձություններից ազդված Պետրոս Մելուսը Մարդինում թողեց տունն ու ունեցվածքը եւ ընտանիքի հետ արագ հեռացավ Սիրիա: Այդ ընթացքում մենք էլ հեռացանք Մարդինից եւ տեղավորվեցինք Ստամբուլի կղզիներում»,-ասել է 1955-ի սեպտեմբերի 6-7-ի ականատեսներից մեկը, ով այդ ժամանակ 13 տարեկան է եղել:
Նշենք, որ 1955-ի սեպտեմբերի 6-ին եւ 7-ին թուրքերի վայրագությունների ընթացքում սպանվել էր 16 հոգի, որոնցից երեքը հայտնաբերվել էին պարկի մեջ այրված: Վիրավորվել էին 500-ից ավել քրիստոնյաներ: Ընդհանուր հաշվով` թալանի էր ենթարկվել 4214 տուն, 1004 գրասենյակ, 73 եկեղեցի, 26 դպրոց եւ այլ հաստատություններ:
http://news.am/arm/news/227881.html