Թուրք ռեժիսորի՝ Հայոց ցեղասպանության մասին ֆիլմին ի պատասխան թուրքերը նոր ֆիլմ կնկարահանեն

Դեռևս Թուրքիայում չցուցադրված` թուրք ռեժիսոր Ֆաթիհ Աքընի նկարահանած «Հատում» («The Cut») ֆիլմին ի պատասխան՝ թուրք ազգայնականները ֆիլմ կնկարահանեն։
Հիշեցնենք, որ ֆիլմում պատմվում է դարբին Նազարեթ Մանուկյանի կյանքի պատմությունը` ցեղապանության ժամանակ նրա կրած դժվարություններն ու զրկանքները:
Պատասխան ֆիլմ նկարահանելու գործին հատկապես ակտիվորեն լծվել է «Հայերի անհիմն պնդումների դեմ պայքարի և զոհվածների հարազատների միության» նախագահ Յուսուֆ Յըլմազը, որը որոշել է այս ֆիլմին ի պատասխան մի նոր ֆիլմ նկարահանել: Յըլմազի խոսքերով` Ֆաթիհ Աքընի արածը և նկարահանած ֆիլմը ոչ այլ ինչ է, քան դավաճանություն:
Յուսուֆ Յըլմազը նշել է, որ եթե «Հատում» ֆիլմը հեռարձակվի Թուրքիայում, ապա ինքը կնախաձեռնի մի ֆիլմի նկարահանություն, որտեղ արծարծված կլինի «հայերի կողմից կոտորված մուսուլմանների խնդիրը»: Յըլմազը ավելացրել է, որ Ֆաթիհ Աքընի արածը ազգային ինքասիրության հարց է, և որևէ մեկն այս ամենը չի կարող ընդունել պարզապես որպես հանդիսատես:
Նշենք, որ այս ֆիլմի շնորհանդեսը կայացել է այս տարվա օգոստոսի 31-ին Վենետիկյան կինոփառատոնում: Ֆիլմը Եվրոպայում նախատեսվում է ցուցադրել այս տարվա հոկտեմբերին, իսկ Թուրքիայում այն պլանավորել են ներկայացնել նույն ամսվա վերջին:
Նշենք, որ նախկինում թուրք ազգայնականների կողմից բազմիցս սպառնալիքներ էին հնչել ռեժիսոր Ֆաթիհ Աքընի հասցեին: Նրանք հավաստիացրել են, որ ամեն ինչ կանեն ֆիլմի ցուցադրումը Թուրքիայում խոչընդոտելու համար:
Հայկ Դարբինյան
AllTurkey.am