Անիում պեղումներ կատարած թուրքերի «բացահայտումները» վաղուց էին հայտնի հայերին. Ակօս

Ներկայիս Թուրքիայի Կարսի նահանգի Անի քաղաքում վերջերս կատարված հնագիտական պեղումները, ըստ էության, որևէ նոր բան չեն բացահայտել, այս պնդման հեղինակը Թուրքիայում լույս տեսնող հայկական «Ակօս» շաբաթերթն է:
«Ակօսի» հոդվածագիրը (շաբաթաթերթի հայերեն էջերի խմբագիր Սարգիս Սերոբյանը-Ակունքի խմբ.) նշում է, որ վերջին շրջանում Թուրքիայում բավականին լայն տարածում են ստացել և մեծամասշտաբ քննարկման առարկա են դարձել Անիի ավերակների մասին խոսակցությունները՝ իբր վերջին պեղումների արդյունքում հայտնաբերվել են նոր իրեր, տաղավարներ, աղոթատեղեր և կատարվել են այլ արժեքավոր բացահայտումներ, որոնք նախկինում հայտնի չէին:
Լրատվամիջոցը իր տարակուսանքն է հայտնում այս ամենի վերաբերյալ՝ շեշտելով, որ իրականում որևէ նոր բան չի բացահայտվել, որովհետև հայկական աղբյուրները կամ Անիում պեղումներ իրականացրած տարբեր կազմակերպություններ բազմիցս հայտնել են այն ամենի մասին, ինչն այսօր խոսվում է թուրքական լրատվամիջոցներում: Ուղղակի այս ամենը նոր է սկսվել քննարկվել Թուրքիայում, և սրա մասին խոսակցությունները ավելի հաճախակի են դարձել:
«Ակօսը», որպես հավելում, ավելացնում է որ հայտարարված գտածոների մի մասի մասին կարելի է տեղեկանալ նույնիսկ առանց հնագիտական պեղումներ իրականացնելու:
Իր այս պնդումը հիմնավորելու համար կայքը բերում է մի քանի փաստարկ: Մասնավորապես, վկայակոչված է ճարտարապետ Թորոս Թորամանյանի «Հայկական ճարտարապետության պատմությունը» գիրքը, որտեղ անդրադարձ կա նաև Անիին:
Հոդվածագիրը, այս գրքից բացի, մատնանշում է նաև մեկ այլ լուսանկարչական ալբոմ, որը վերնագրված է «1050 ամյակ» անվամբ: Ալբոմի 264 էջերում լուսանկարներով ներկայացված են Անի քաղաքի ստորգետնյա ճանապարհները, ապաստարանները և այն բոլոր տեղեկությունները, որոնք, իբր, հայտնի են դարձել վերջերս Անիում իրականացված պեղումների արդյունքում:

Հայկ Դարբինյան
AllTurkey.am