Նալբանդյանը Էրդողանին պաշտոնապես հրավիրեց Երևան

Արտգործնախարար Էդվարդ Նալբանդյանն Անկարայում օգոստոսի 28-ին ներկա է գտնվել Թուրքիայի նորընտիր նախագահ Ռեջեփ Թայիփ Էրդողանի պաշտոնի ստանձնման արարողությանը, հաղորդում են ԱԳՆ մամուլի ծառայությունից:
Արարողությունից հետո պատվիրակությունների ղեկավարների պատվին տրված ընդունելությանը Նալբանդյանը կարճատև զրույց է ունեցել Էրդողանի հետ, որին հանձնել է ՀՀ նախագահ Սերժ Սարգսյանի պաշտոնական հրավերը՝ 2015թ. ապրիլի 24-ին ներկա գտնվելու Երևանում կայանալիք Հայոց ցեղասպանության զոհերի հիշատակի ոգեկոչման արարողությանը։
Երևանից Անկարա մեկնած պատվիրակության կազմում էին ԱԳՆ մամուլի քարտուղար Տիգրան Բալայանը, ԱԳՆ Սահմանակից երկրների վարչության պետ Արսեն Ավագյանը: Էրդողանի երդմնակալության արարողությանը մասնակցել է նաև Պոլսի հայոց պատրիարքի փոխանորդ Արամ արքեպիսկոպոս Աթեշյանը, որին ուղեկցել է հայ համայնքի բարերարներից Պետրոս Շիրինօղլուն:
Օգոստոսի 28-ին Թուրքիայի նախագահական պալատում տեղի է ունեցել Ռեջեփ Թայիփ Էրդողանի երդման արարողությանը, որին մասնակցել են շուրջ յոթ տասնյակ օտարերկրյա առաջնորդներ և բարձրաստիճան պաշտոնյաներ: Միջոցառմանն առնվազն 15 երկիր ներկայացված էր ամենաբարձր՝ նախագահի կամ պետության ղեկավարի, 6 երկիր՝ խորհրդարանի նախագահի, 12 երկիր՝ վարչապետի, 3 երկիր՝ փոխնախագահի, 7 երկիր՝ փոխվարչապետի և մոտ 40 երկիր, այդ թվում` Հայաստանը, նախարարի մակարդակով: Արարողությանը ներկա էին 9 միջազգային կազմակերպությունների ներկայացուցիչներ:

http://civilnet.am/nalbandyan-erdogan-inauguration-invitation-armenia-april-24/