Թուրքերը տոնել են Անիի նվաճումը

Բագրատունյաց Հայաստանի մայրաքաղաք Անիում օրերս նշվել է Կարսից Անատոլիա ներխուժելու 950-ամյակը [Անատոլիա ասելով թուրքերը հասկանում են Արևմտյան Հայաստանն ու Փոքր Ասիան` ամբողջությամբ վերցրած, իսկ Անին սելջուկ-թուրքերը նվաճել են 1064թ.- ՍիվիլՆեթ]: Միջոցառման իրականացմանն աջակցել են Կարսի նահանգապետարանը, քաղաքապետարանը, «Կովկաս» ինստիտուտը, թուրքական մի շարք այլ հասարակական կազմակերպություններ: Արարողության կազմակերպման գործում մեծ է Ազգայնական շարժում կուսակցության դերը: Միջոցառման մասին թուրքական Turnusol կայքը հեգնանքով գրում է, թե թուրքերն «այս անգամ էլ նվաճեցին հայ թագավորների մայրաքաղաք Անին»: Բագրատունի հայկական արքայատան թագավորների մայրաքաղաք Անիում, որտեղ ամբարված են հայկական մշակութային ժառանգության կարևոր հուշարձանները, տեղի է ունեցել մի տարօրինակ արարողություն, գրում է կայքը: Հոդվածը թարգմանաբար ներկայացված է ստորև:
Միջոցառման մասնակիցներն Անիի պարիսպների մոտ ծածանել են Թուրքիայի դրոշը, այնուհետ այն վայրում, որտեղ պնդում են, թե Ալփարսլան սուլթանը իջել է ձիուց ու թափահարել թուրը, ներկայացում են տվել Թուրքիայի ազգային կրթության նախարարության ժողովրդական պարի խմբերը:
Ավանդական պարից հետո մասնակիցները շրջել են Անիի ավերակներում, այցելել Մանուչեի մզկիթ, ապա` Մայր տաճար: Կարս-Անի միջազգային առաջին գիտաժողովի նախագահ Օքթայ Բելլին հայտարարել է. «Այստեղից ձայնում ենք աշխարհին: Անիից ենք սկսել քաղաքակրթությունը տարածել աշխարհում: Թուրքական, իսլամական աշխարհի, Անատոլիայի, Բալկանների, Կենտրոնական Եվրոպայի առաջին մզկիթը Անիում ենք կառուցել, առաջին նամազն այստեղ ենք արել: Առաջին իջևանատներն այստեղ ենք կառուցել: Մենք որքան էլ պարծենանք Անիով, միևնույնն է` քիչ է»:
Նահանգապետ Գունայ Օզդեմիրն էլ հայտարարել է, որ Անիի նվաճումը թուրքական աշխարհի, ինչպես նաև համաշխարհային պատմության տեսանկյունից կարևոր և շրջադարձային նշանակություն ունի: «Անատոլիայի նվաճումը Անիի գրավմամբ սկսվեց, Անատոլիայում քաղաքակրթության մուտքը սկսվեց Անիից: Այդ իսկ պատճառով էլ աշխարհի համար այդքան կարևոր նշանակություն ունի Անիի նվաճումը»,- ասել է Օզդեմիրը:
Ուշագրավ է, որ թուրքերը ոչ թե «Անի» են գրում, այլ «Անը»՝ պնդելով, թե դա քաղաքի իսկական անունն է: «Անը» թուրքերեն նշանակում է «հուշ»: Իսկ Անիում տասնյակ եկեղեցիները ներկայացվում են որպես բյուզանդական:
Ամիսներ առաջ էլ թուրքական Anadolu գործակալությունը Անիին նվիրված ակնարկ էր պատրաստել, որի համաձայն` քաղաքի առաջին բնակիչները թուրքերն են, իսկ Անիի ամենակարևոր մշակութային ժառանգությունը՝ մզկիթները:
Ի դեպ` 2010թ. նույն Ազգայնական շարժում կուսակցությունը` իր առաջնորդ Դևլեթ Բահչելիի գլխավորությամբ, նամազ էր արել Անիում` այդպիսով իր բողոքն արտահայտելով Վանի Աղթամար կղզու Սուրբ խաչ եկեղեցու վերաբացման դեմ:

http://civilnet.am/turkey-celebration-selcuk-invasion-armenia-ani/