Թուրք բլոգերը հոդվածաշար է սկսում Հայոց ցեղասպանության մասին

Թուրքական «Ռադիկալ» կայքի բլոգում Ֆաթիհ Թունչը սկսում է հոդվածաշար` Թուրքիայի հայերի և Հայոց ցեղասպանության մասին: Թունչը նշում է, որ թեմայի վերաբերյալ բազմաթիվ աշխատություններ, հոդվածներ է կարդացել, սակայն բոլորն էլ ավելի շատ փորձել են արդարացնել իրենց համար ավելի հարազատ կողմերից մեկին, քան ներկայացնել գիտական փաստերը: «Այդ ստեղծագործություններից և ոչ մեկում չի պարզաբանվում, թե ինչու են հազարավոր մարդիկ սպանվել: Ինչո՞ւ են երեխաներ սպանվել, ինչո՞ւ են մոր աչքի առաջ երեխային այրել»,-գրում է Թունչը՝ նշելով, որը ինքը գրի է առել հենց այն ամենը, ինչ տեսել է ժողովուրդը:
Առաջին հոդվածում Թունչը, հայերի վիճակի մասին սեղմ ակնարկ տալով, ներկայացնում է այն հարցերը, որոնց անդրադառնալու է հաջորդ հոդվածներում:
Հիմնականում Թուրքիայի արևելքում և հարավ-արևելքում քրդերի հետ կողք կողքի ապրած ժողովուրդը ժամանակի ընթացքում իր դավանանքի պատճառով աքսորվել և կոտորածների է ենթարկվել: Հայերն իրենց մայրենի լեզվին զուգահեռ շատ լավ քրդերեն են իմացել: Դրա պատճառներից են հայերի՝ առևտրի բնագավառում բավականին առաջատար լինելը և քրդերենի տիրապետող դիրքը:
Չնայած հայերի ռազմական ունակությունները բավականին զարգացած էին, բայց որպես հասարակություն նրանց խիզախությունը կոտրվել էր: Բացի այդ երկարատև ասիմիլացիայի էին ենթարկվել ու ապրելու համար կրոնափոխ էին եղել: Ժամանակին քրդերի հետ միասին ապրած և նրանց հետ որևէ խնդիր չունեցած հայերը իրենց կրոնի պատճառով քրդերի կողմից ճնշումների և կոտորածների են ենթարկվել:
Հոդվածագիրը նշում է նաև որ հայերը մինչև 1915 թվականը համապարփակ կերպով ապրել են Աղրըի (Արարատ-Ակունքի խմբ.), Մուշի, Վանի, Բիթլիսի (Բաղեշ-Ակունքի խմբ.), Մարդինի, Կարսի, Ամեդի (Տիգրանակերտ/Դիարբեքիր-Ակունքի խմբ.), Դերսիմի շրջաններում:
«Տարածաշրջանում բավականին լավ գործունեություն ծավալող հայերը ինչո՞ւ սպանվեցին: Ինչո՞ւ քրդերը և հայերը ոչ մի կերպ համաձայնության չեկան: Ովքե՞ր էին համիդյան գնդերի հրամանատարները և ինչո՞ւ համախմբվեցին հայերի կոտորածների ժամանակ: 1915-ին որքան մարդ է սպանվել: Հայերի դեմ սկսված այդ պատերազմի պատճառներն ու պատրվակները որո՞նք էին»,- այս հարցերն է ուղղում Թունչը՝ հստակեցնելով, որ սա ընդամենը ընթերցողին հավելյալ տեղեկություն տալու համար է գրել:
http://ermenihaber.am/?lang_id=2&menyu_id=3&top_current=225