Ստամբուլահայ լրագրող. Հայաստանի հանդեպ Թուրքիայի քաղաքականությունը չի փոխվի

Թուրքիայում նախագահական ընտրությունների արդյունքներն անսպասելի չէին. վարչապետ Ռեջեփ Թայիփ Էրդողանի՝ առաջին փուլում հաղթանակը կանխատեսելի էր: Այս մասին NEWS.am-ի թղթակցի հետ զրույցում հայտարարեց Ստամբուլի հայկական «Ժամանակ» օրաթերթի խմբագիր Արա Գոչունյանը:

Նա նշեց, որ օգոստոսի 28-ին կայանալու է նախագահի երդմնակալության արարողությունը: «Թուրքիայում շարունակվելու է ավելի քան 10 տարի իրականացվող քաղաքականությունը»,- ընդգծեց Գոչունյանը: Հայաստանի հանդեպ քաղաքականությունը նույնպես, նրա համոզմամբ, զգալի փոփոխություններ չի կրի: Ըստ լրագրողի, տարածաշրջանային գործընթացները մեծ հույսեր չեն ներշնչում հայ-թուրքական հարաբերությունների բարելավման առումով:

Արա Գոչունյանը հավելեց, որ 10 ամիս անց Թուրքիայում նաեւ խորհրդարանական ընտրություններ են նախանշված: «Մեծ է հավանականությունը, որ դրանք կանցկացվեն ժամկետից շուտ»,- նշեց նա՝ պարզաբանելով, որ Թուրքիայում քննարկվում է կիսանախագահական հանրապետության անցնելու հարցը: Գոչունյանը հիշեցրեց, որ նախագահը պետք է անկուսակցական լինի: «Էրդողանը պետք է հրաժարվի ինչպես վարչապետի պաշտոնից, այնպես էլ իշխող Արդարություն եւ զարգացում կուսակցության ղեկավարումից: Այս պայմաններում նոր կառավարություն պետք է ձեւավորվի»,- ասաց Արա Գոչունյանը:

Հիշեցնենք, որ Թուրքիայի գործող վարչապետ Ռեջեփ Թայիփ Էրդողանը, հավաքելով 52% ձայն, հաղթել է նախագահական ընտրությունների առաջին իսկ փուլում:

http://news.am/arm/news/223572.html