Թուրքիայի արեւելքում Էրդողանը ջախջախիչ պարտություն է կրում

Թուրքիայում նախագահական ընտրությունների նախնական արդյունքներով Դերսիմում եւ արեւելյան նահանգներում նախագահի թեկնածու Ռեջեփ Թայիփ Էրդողանը ջախջախիչ պարտություն է կրում:
Թուրքիայի Կենտրոնական ընտրական հանձնաժողովի տվյալներով հարավ-արեւելյան Հաքքարի նահանգում բացարձակ առաջատարն է Սելահաթթին Դեմիրթաշը՝ 80 տոկոս հավաքած ձայների քանակով: Դեմիրթաշը հետաքրքիր ռեկորդ է սահմանել Հաքքարի նահանգի Յուքսեքօվայի շրջանում՝ 92 տոկոս, իսկ նույն տեղում Էրդողանին իրենց ձայնը տվել են ընտրողների ընդամենը 6 տոկոսը:
Շրնաք նահանգում եւ մյուս արեւելյան նահանգներում անվիճելի առաջատարն է Սելահաթթին Դեմիրթաշը:
Թուրքիայի կենտրոնում գտնվող Թունջելի (Դերսիմ) նահանգում, որտեղ հիմնականում բնակվում են ալեւիներ, զազաներ եւ քրդեր, Էրդողանին հաջողվել է հավաքել հազիվ 15 տոկոս, իսկ որոշ շրջաններում Էրդողանին տված ձայները մինչեւ 2 տոկոս են: Այս նահանգում եւս առաջատարը Սելահաթթին Դեմիրթաշն է:
Իսկ Թուրքիայի ընդհանուր տարածքում Էրդողանն անվիճելի առաջատար է՝ 53 տոկոս ձայներով, որին հետեւում է Էքմելեդին Իհսանօղլուն՝ 37 եւ քուրդ թեկնածու Դեմիրթաշը՝ 9 տոկոս ձայներով: Այս թվերը վերցված են բացված 93 տոկոս քվեատուփերի արդյունքներից:
Նշենք, որ Թուրքիայում առաջին անգամ ժողովուրդը նախագահ է ընտրում: Նախկինում նախագահին ընտրում էր խորհրդարանը՝ պատգամավորների թվից:
http://news.am/arm/news/223414.html