Թուրք ազգայնականները սպառնում են ռեժիսոր Ֆաթիհ Աքընին Ցեղասպանության մասին ֆիլմի համար

Թուրք ազգայնականների խումբը սպառնացել է թուրքական ծագումով գերմանացի անվանի ռեժիսոր Ֆաթիհ Աքընին Հայոց ցեղասպանությանն անդրադարձող «Հատում» («The Cut») նոր ֆիլմի համար, գրում է Hurriyet Daily News-ը:
Ötüken կոչվող ամսագիրը՝ Թուրք-թուրանական ասոցիացիայի հրատարակությունը, առցանց հայտարարություն է տարածել՝ ասելով, որ այն թույլ չի տա, որպեսզի ֆիլմը ցուցադրվի Թուրքիայում, երբ պարզվել է, որ ռեժիսորը հարցազրույց է տվել հայկական «Ակօս» շաբաթաթերթին:
«Մենք բացահայտ սպառնում ենք «Ակօս» թերթին, հայ ֆաշիստներին և, այսպես կոչված, մտավորականներին»,- ասված է հաղորդագրության մեջ: «Այդ ֆիլմը չի ցուցադրվի Թուրքիայի և ոչ մի կինոթատրոնում: Մենք հետևում ենք զարգացումներին մեր սպիտակ գլխարկներով և Ադրբեջանի դրոշներով»,- նշվում է հայտարարությունում:
Սպիտակ գլխարկը հստակ հղում է Հրանտ Դինքի սպանությանը. «Ակօս» թերթի խմբագրապետի մարդասպանը սպիտակ գլխարկ է կրել հանցագործության օրը:
Աքընի նոր ֆիլմում ֆրանսիացի դերասան Թահար Ռահիմը խաղում է Մարդինում ապրող հայի դեր, ով ողջ է մնացել 1915 թվականի Հայոց ցեղասպանությունից հետո և ճանապարհորդություն է սկսել՝ հասնելով մինչև Ամերիկա՝ փնտրելու իր երկու դուստրերին:
Թուրք ազգայնականների խոսքերով՝ ֆիլմն առաջին քայլն է Թուրքիային Հայոց ցեղասպանությունը ճանաչել ստիպելու ուղղությամբ:
«Ակօս»-ին տված հարցազրույցում 40-ամյա ռեժիսորը նշել էր, որ նա պատրաստվում է Հրանտ Դինքի կյանքի մասին ֆիլմ նկարահանել, սակայն նրան չի հաջողվել թուրք դերասան գտնել, ով կցանկանա մարմնավորել գրողին:
http://www.tert.am/am/news/2014/08/05/fatih-threatened/