Հայերը Սասունի Մարութա լեռան վրա նշել են Վարդավառը

Ներկայում Թուրքիայի տարածքում գտնվող Սասունի Մարութա (Մարաթուկ) սարի ամենամյա ուխտին են մասնակցել եւ Վարդավառը նշել են Սասունում բնակվող եւ աշխարհի տարբեր վայրերից եկած հայերը։
Ինչպես տեղեկացնում է Sasun.org կայքը, այս տարի Ֆրանսիայից, ԱՄՆ-ից, Հայաստանից եւ Սասունի տարբեր գյուղերից ժամանած հայերը բարձրացել են Մարութա սար, մոմ վառել գագաթին գտնվող Մարութա Բարձր Աստվածածին մատուռում եւ նշել Վարդավառը։
Սասուն ժամանած հայերի մի մասն այցելել է Սասունի քաղաքապետ Ջումա Ուչարին, իսկ վերջինս հայ ուխտավորներին Սասունի մեղր եւ սուջուխ է նվիրել։
Նշենք, որ Մարութա սարը գտնվում է Արեւմտյան Հայաստանի Սասուն գավառում եւ եղել է սասունցիների սիրած եւ պաշտելի սարը, որը կոչվել է նաեւ Մարաթուկ։
http://news.am/arm/news/222346.html