Արամ Ա. «Թռչնոց բույն»-ում կառուցվող թանգարանը եզակի է իր բնույթով ու նպատակով

Բեյրութի մերձակա Ջիբեյլ (Բիբլոս) քաղաքում գտնվող «Թռչնոց բույն» որբանոցի տարածքում ավարտին է մոտենում Հայոց ցեղասպանությանը և որբերին նվիրված թանգարանի շինարարությունը: Այս մասին նշված է Մեծի Տանն Կիլիկիո կաթողիկոսության պաշտոնական կայքում:

«Հոգեկան անհուն ուրախությամբ հավաստում եմ, որ Հայոց ցեղասպանությանն ու որբերին նվիրված թանգարանի շինարարությունը հասել է իր վերջնակետին: Հայոց ցեղասպանության նվիրված բազմաթիվ թանգարաններ կան, և նորերն էլ կառուցվում են թե Հայաստանում, թե Սփյուռքի մեջ, սակայն այս թանգարանը եզակի է իր բնույթով ու նպատակով»,-հայտարարել է Ն.Ս.Օ.Տ.Տ. Արամ Ա. Կաթողիկոսը:

Թանգարանն ունենալու է երեք բաժին` նվիրված Հայոց ցեղասպանությանը, որբերի կյանքին և հայ ժողովրդի վերածննդին: Թանգարանի շինարարությունը կավարտվի վեց ամսվա ընթացքում:

Բոլոր նրանք, ովքեր «Թռչնոց Բույնի» կամ ընդհանրապես որբերի վերաբերյալ փաստաթղթեր ու գրքեր ունեն, կարող են դրանք տրամադրել թանգարանին:

Նշենք, որ «Թռչնոց բույնը» 1922-ին Սայդայում հիմնել է դանիացի միսիոներուհի Մարիա Ցակոբսոնը, որն Առաջին համաշխարհային պատերազմի տարիներին փրկել է բազմաթիվ հայ որբերի կյանք: Որբանոցը Ջիբեյլ է տեղափոխվել 1928 թվականին։
http://www.panorama.am/am/society/2014/08/01/aram-a-genocide/