Թուրքիայի գլխավոր ընդդիմադիր Ժողովրդահանրապետական կուսակցության փոխնախագահ Սեզգին Թանրըքուլուն հայտարարել է, որ վարչապետ Ռեջեփ Թայիփ Էրդողանը լավ էլ գիտի, թե ովքեր են «Ակօս» թերթի հայազգի խմբագրապետ Հրանտ Դինքի սպանության կազմակերպիչները: Նա նշել է, որ Դինքի սպանությունն իրականացվել է ոչ թե ինչ-որ անհատի, այլ կազմակերպված հանցավոր խմբի կողմից: Այս մասին, ինչպես հաղորդում է «Արմենպրես»-ը, հայտնում է թուրքական CIHAN լրատվական գործակալությունը:
Թուրք քաղաքական գործիչն ասել է, որ Դինքի սպանությունն ամբողջ աշխարհում մեծ արձագանք գտած և քաղաքական հողի վրա կատարված ամենացնցող հանցագործություններից է, որում ներգրավված են նաև երկրի ղեկավար շրջանները: Նրա խոսքով՝ Դինքի սպանության պատասխանատուները գտնվում են Թուրքիայի իշխող Արդարություն և զարգացում կուսակցության պաշտպանության տակ:
«Վարչապետը փորձում է Դինքի սպանությունը ներկայացնել անձնական թշնամական հողի վրա կատարված հանցագործություն: Սպանության իրական կազմակերպիչները դեռևս չեն կանգնել դատարանի առաջ: Իշխանության այդ վարկածն առաջ է տարվում իրական հանցագործներին դատաստանից փրկելու համար: Դինքի սպանությունը մեկ անձի ձեռքի գործ չէ` ինչպես ներկայացվում է: Դա կազմակերպված խմբակային հանցագործություն է: Էրդողանն էլ գիտի, թե ովքեր են կազմակերպիչները», -ասել է Թանրըքուլուն:
Հրանտ Դինքը սպանվել է 2007 թ. հունվարի 19-ին «Ակօս» թերթի խմբագրատան առաջ: 2012 թ. հունվարի 17-ին Ստամբուլի ծանր հանցագործությունների 13-րդ դատարանը սպանությունը ծրագրելու և ուղղորդելու մեջ մեղավոր ճանաչված Յասին Հայալին դատապարտել է ցմահ ազատազրկման, սպանությունն իրագործած Օգյուն Սամասթին` հանցագործության պահին անչափահաս լինելու հիմնավորմամբ` 22,5 տարվա ազատազրկման: Դատական վճռում նշվել էր, որ գործով անցնող մեղադրյալները ոչ թե «ահաբեկչական զինված խմբավորման», այլ «հանցագործություն կատարելու նպատակով ստեղծված» խմբի անդամներ են: Թուրքիայի Վճռաբեկ դատարանը 2013 թ. մայիսի 5-ին բեկանել է Ստամբուլի ծանր հանցագործությունների 13-րդ դատարանի ընդունած վճռի այն կետը, որում նշվել էր, որ Հրանտ Դինքի սպանության հետևում «ահաբեկչական զինված կազմակերպություն» կանգնած չէ:
http://www.tert.am/am/news/2014/07/30/tanrikulu/

Էրդողանը գիտի, թե ովքեր են Հրանտ Դինքի սպանության կազմակերպիչները. թուրք քաղաքական գործիչ
•
Leave a Reply