Հայերը Վարդավառի տոնի կապակցությամբ այցելել են Սասուն

Ֆրանսիայից, ԱՄՆ-ից և մի շարք այլ երկրներից Ստամբուլ ժամանած հայերը Վարդավառի տոնին այցելել են Սասուն, բարձրացել Մարաթուկ լեռը: Թուրքական «Հաբերլեր» լրատվական կայքը հայտնում է, որ հայերը հանդիպել են Սասունի քաղաքապետ Ջումա Ուչարի հետ:

Հայերի անունից հայտարարությամբ հանդես եկած Բեսե Քաբաքը հայտնել է, որ Սասուն են այցելել` ամեն տարի Մարաթուկ լեռան վրա անցկացվող Վարդավառի տոնի կապակցությամբ: Քաբաքը քաղաքապետ Ուչարին նվիրել է համահայկական օլիմպիադայի ժամանակ Սասունի պատվիրակության պաշտոնական վզարկուն (շարֆ) և գլխարկը, որոնց վրա պատկերված է Մարաթուկ սարը:
Ուչարը, շնորհակալություն հայտնելով նվերների համար, գոհունակություն է հայտնել այցելության համար:

«Մենք հայերի հետ խնդիր չունենք: Հայերի նմանատիպ այցելություններից շատ գոհ ենք»,- նշել է Ուչարը՝ հավաստիացնելով, որ պատրաստ են իրենց հնարավորությունների սահմաններում ամեն ինչ անել:

Ուչարը ընդգծել է, որ իրենց նպատակն է ներկայացնել տարածաշրջանն ու գավառը և այնտեղ գտնվող պատմական ու զբոսաշրջային վայրերը: Նա հյուրերին Սասունի մեղր է նվիրել:

http://ermenihaber.am/?lang_id=2&news_=7&cur_news=1714